COTABATO CITY -- Nakamugna og kahadlok sa mga molupyo ang nakaplagan nga mga high explosives alas 7 sa buntag niadtong Lunes, Septiyembre 16, sa siyudad.
Sa taho gikan sa Cotabato City Police Office, nasayran nga nakaplagan sa mga sibilyan ang mga eksplosibo sa punoan sa saging sa Malagapas, Barangay Rosary Heights 10 sa dakbayan kilid lang sa Children’s Park sa Purok Omar, duol sab sa city hall.
Dali kining gitaho ngadto sa mga opisyal sa barangay ug sa kapulisan hinungdan nga nagresponde dayon ang mga awtoridad.
Mga eksplosibo gilangkuban sa duha ka granada, usa ka bala sa M2O3 grenade launcher ug usa ka improvised grenade launcher nga luwas nga nakuha sa mga sakop sa Explosive Ordinance Disposal Team.
Kahinumdoman nga niadtong bulan sa Mayo atol sa eleksiyon, tulo ka bala sa 40mm ang nibusikad sa susamang dapit.
Nasayran nga ang Children’s Park pipila lamang ka metros likod sa People’s Palace o City Hall sa siyudad.
Kapulisan sa Cotabato City nga gipangulohan ni Colonel Portia Manalad, padayon nga nag-ukoy sa mga tawong nagbilin niini sa maong dapit. (Edgar E. Fuerzas)