KORONADAL CITY -- Nagkabali-bali ang lawas sa mga napatay sa nahulog nga trak sa pangpang alas 9:05 sa buntag Martes, Septyembre 17, sa probinsiya sa South Cotabato.
Moabot sa 15 ka tawo ang on the spot nga napatay nga sa pagsuwat ning balita wala pa mailhi ang mga bansagon.
Hinuon mga nakabsan sa kinabuhi paghidangat sa Upper Valley Community Hospital nailhan nga sila Hershey Pasquin, 6, Trusha Apus, 10, Regine Divine Ayupan, 6, Wilyn Jade Babon, ug laing batang lalaki nga wala pa mailhi.
Moabot sab sa 14 ang mga samaron kinsa nadala sa Upper Valley Community Hospital nga mao sila Hailey Pasquin, usa ka tuig ang pangedaron, Hernanie Pasquin, 34, Pretty Gabio, 9, Dave Ayupan, 12, Ian Decolongon, 28, Shane Gabio, 27, Analyn Pendatun, 30, Rodel Rabara, 41, Argie Gaylar, 34, Princess Gabio, 8, samtang upat sab ang nadala sa South Cotabato Provincial Hospital.
Sa taho gikan sa South Cotabato Police Provincial Office, nasayran nga sakay ang mga biktima sa Forward truck apan kalit lang nawad-an kini og preno pag-abot sa Barangay Lamsalome, T’boli, South Cotabato.
Diretso nga nahulog ang trak sa 50 metros nga gilawmon sa bung-aw kilid sa kalsada.
Nasayran nga mga biktima kuyog sa beach sa General Santos City ug nag-overnight gumikan birthday sa anak sa tag-iya sa trak nga si Hernanie Pasquin, kinsa usa ka negusyante.
Pauli na unta sa Surallah, South Cotabato ang mga biktima nga giingong agi sa shortcut nga bahin, apan way subo kay nadisgrasiya sa maong dapit.
Kapulisan sa T’boli Municipal Police Station padayon nga nag-imbestiga aron mailhan ang bansagon sa uban pang namatay ug ang drayber sa trak. (Edgar E. Fuerzas)