ALAS sayis sa hapon. Lawom ang gihunahuna ni Atty. Greg Conde sa paghunong niya sa pula nga suga sa trapiko. Gikulbaan siya. Dili niya asawa ang iyang katupad sa front seat sa iyang kotse. Si Clarita ang iyang katupad, kanhi uyab niya sa wa pa maminyo kang Myrna, nga iyang klasmeyt sa Political Science.
Kadaghan na magsigeg tawag si Clarita nga makig-deyt kang Greg. Napulo na ka tuig nga wa sila magkita gikan sa ilang panagbuwag nga si Myrna ang hinungdan. Nagplano man god si Greg kaniadto nga dili mangasawa kang Clarita. Nakasabot sab si Clarita kay ikatulo man niyang uyab si Greg, ug di na siya putli sa iyang pagtahan sa iyang pagka babaye ngadto kang Greg. Ang ilaha, tagbaway lang sa lawasnong kahinam. Gani may mga higayon sulod sa motel nga kon bation ni Clarita ang kinapungkayan sa himaya, paraygon siyang moingon kang Greg, “Bisag minyo na ka, Greg, sige gihapon ta, ha?” Motando na lang sab si Greg aron way daghang estorya.
Duha ang anak ni Greg kang Myrna. Tulo ang kang Clarita sa buwag niyang bana. Maong magsigeg panawag si Clarita kang Greg aron balikon ang ilang kagahapon. Nakuryuso si Greg kon unsa nay hitsura ni Clarita.
Selosa ang asawa ni Greg ug may sakit kini sa kasingkasing. Maong gisaaran niya si Myrna sukad sila naminyo nga di na siya motan-aw og laing babaye.
Nakalugar si Greg pagkuha kang Clarita sa opisina niini isip Accountant tungod kay may gitambungan nga party si Myrna. Alas nuybe pa sa gabii magpakuya sa Sitio Baca diin gisaulog ang birthday party sa kauban niyang maestra. Puro mga maestra lang ang giimbitar. Way labot ang mga bana.
Gitimbang-timbang ni Greg ang iyang kahimtang. Wa gyud siya kasala sa iyang kaminyuon. Karon pa gyud kon mahinayon. Sa iyang tan-aw sas iyang katupad, seksi ug guwapa gihapon kini. Nagpahiyom siyang nagpasiklap niini. Mibawos pagpahiyom si Clarita nga daw kahambaton na gyud. Fighter gyud hinuon siya sa kama. Kada suod nilag motel kaniadto di siya makuntento kon di kaabot og katulo ang ilang kumbati. “Mao tingaling gibuwagan sa bana!” tuaw ni Greg sa hilom. Nabuhat na nila ang tanang lihok ug posisyon sa salida nga bomba kun porno films.
Nangaon sila sa Green Meadow Restobar. Si Clarita mipasalig nga maoy mobayad sa ilang gikaon. Si Greg maoy mobayad sa motel. Nagsige gihapon og hunahuna si Greg. Relihiyuso na siya. Mahadlok na siyang makasala sa Diyos ug sa iyang asawa. Gawas pa ini, seloso sab siya. Mahanduraw gani niya si Clarita nga nakighilawas og laing lalake, mosurok iyang dugo. Unya ang iyang asawa duha ra ka bata ang nilusot sa bilahan; samtang ang kang Clarita, tulo. Gihugawan na si Greg kang Clarita.
Pagka human ni Greg og kaon midagan siya padung sa rest room. Nagpaka-aron ingnon siya nga naglain ang iyang lawas. Kasukaon ug kalibangon kunohay. Dihang nahigawas na siya sa rest room, basa ang iyang nawong ug buhok nga morag gipaningot.
“Naunsa man ka?” ni Clarita nga paraygon ug daw nabalaka kini.
“Misuol akong ulcer!” ni Greg nga nanarapo og panyo sa iyang nawong. “Postpone lang una nato atong deyt.” Ang nawong niya daw luspad ug luya.
Miluta ang ka-dismaya sa nawong ni Clarita nga naminghoy.
“Ihatod lang tika sa inyo,” ni Greg.
Sa misunod nga mga adlaw inig tawag ni Clarita gibalibaran ni Greg nga bisi siya. Ang iyang sekretarya maoy iyang gipatubag sa telepuno kon mobagting kini. Nagpalimod na siya kon si Clarita ang motawag. Mapasalamaton siya nga nakalikay sa tentasyon. Ug hugot na ang iyang hukom nga di na gayud magpatental pag-usab.
(KATAPUSAN)