DUNAY laing dakong problema ang nag-atubang sa tibuok kalibotan karon, labi na gyod sa mga pobre nga mga nasod.
Unsa man kini?
Mao kini ang gipaabot nga pagsaka sa presyo sa gasolina ug krudo human bombahi ang usa ka dakong planta sa pagproseso sa krudo didto sa Saudi Arabia.
Sa mga nasod nga nagsalig sa gasolina ug krudo sama sa Pilipinas, dako kaayo kini og epekto.
•••
Tungod sa pagkaguba sa maong dakong planta sa Saudi Arabia, segurado nga mag-nihit gyod ang supply sa krudo og gasolina sa tibuok kalibotan, labi na gyod sa mga nasod sa Asia nga kasagaran nagkuha sa ilang supply sa Saudi.
Sa atong nahibaw-an, magkutay-kutay dayon ang epekto sa presyo kon mosaka ang presyo sa krudo ug gasolina.
Mapaabot nato nga mosaka ang presyo sa pamasahe sa pasahero ug cargo eroplano ug barko. Momahal sab ang presyo sa tanang mga palaliton nga nagsalig sa mga makina nga gipadagan sa krudo ug gasolina. Momahal sab ang presyo sa koryente sanglit gipadagan man kini sila sa mga planta nga mogamit og krudo ug gasolina.
•••
Tungod kay mosaka man ang presyo sa mga pagkaon ug uban nga mga palaliton, segurado nga motiyabaw og dugang sweldo ang mga empleyado kay dili na man paigo ang ilang sweldo aron mabuhi sa disente nga panginabuhi.
Sa mga kompaniya nga dili makasukol sa pagsaka sa sweldo sa ilang mga empleyado, mosira na lang kay segurado nga ma-bankcrupt man sila kon magpadayon sa ilang negosyo. Kadtong mga dagkong kompaniya na lang ang mahimong magpadayon pagpadagan sa ilang negosyo.
Hasta ang mga empleyado sa gobierno maapektohan sab tungod kay parehas ra man sila nga mokaon ug mopalit sa mga mahal nga mga palaliton.
Ang pangutana nga nagtangag og kalibog sa katawhan, makaya ra ba sa panudlanan sa kagamhanan kining pagsaka sa tanang mga palaliton?
Hangtod kanus-a kining maong pagnihit sa supply sa krudo ug gasolina?
Unsay angay nato buhaton samtang nag-atubang kitang tanan sa maong problema?
•••
Likayan nato ang pag-usik-usik sa krudo ug gasolina pinaagi sa pagplano sa byahe matag adlaw.
Kon mahimo, gamiton nato ang atong bisekleta imbes mosakay sa atong awto o motor sa atong mga lakaw matag adlaw.
Kon mahimo, dili nato gamiton ang atong airconditioner o electric fan sa atong pagka-tulog.
Kon mahimo, likayan nato ang kanunay nga pag-gamit sa mga himan nga mogamit og koryente sama sa hair dryer, bread toaster, microwave oven.
Kon mahimo, mosayo og katulog sa gabii aron dili magamit og dugay sa sugang dagitab aron makadaginot.