Lonzon: Sakit sa baboy

DAGHANG nangahadlok sa sakit nga African Swine Fever (ASF) nga miigo sa pipila ka mga lugar sa Metro Manila.

Kinsa may di mahadlok nga nahimong positibo ang resulta sa sample sa nangamatay nga baboy.

Mao daghan ang wa mokaon una og baboy sa pagkakaron gumikan sa maong sakit nga mitakod na usab sa pipila ka mga lugar.

Bisan unsaon sa pagpasalig sa Secretary sa Department of Agriculture nga luwas kan-on ang baboy di kapugngan ang kahadlok.

Gani dinhi sa Sugbo, hugot ang pagmonitor, gawas sa dunay pag-ban sa mga karne gikan sa gawas sa nasud ug sa Manila.

Mismo si Gobernador Gwen Garcia mipagawas og executive order sa pagdili sa pagsud sa maong matang sa karne.

Kini raba nga sakit sa ASF way tambal ug dali motakod. Ang baboy nga magkasakit gikinahanglang sunugon.

Kay simbako ug makasud dinhi sa Sugbo, hurot gyud ang tanang baboy nga maoy usa sa nag-unang produksyon.

Ang Sugbo naila nga maoy labing lamian nga tigluto og letson sa tibuok Pilipinas, ilabi na ang sa siyudad sa Talisay ug ubang lugar.

Tungod niini, mityabaw na ang mga negusyante ug baboy tungod sa pagnihit sa mga namalit niini.

Gawas niini di sab makabasol ang mga negusyante og letson kon di una kita mamalit sa pagkakaron.

Unahon usa nato ang kasiguroan sa atong panglawas. Puwerting mahala na raba sa pagpa doktor karong panahuna.

Kon hugot ang siguridad sa mga pantalan ug airport aron di nakasud ang baboy labaw pakita nga maglikay.

Kay bawal ang magkasakit. Ako kaon lang og isda, utanon ug ubang matang sa pagkaon nga makapahimsog sa atong kalawasan.