TINUOD nga linghod pa og hunahuna ang mga batan-on o bayungbayong sa pagbalanse sa maayo o dili sa ilang lihok o aksiyon. Apan dili kini igong rason ug himuong pagpanalipod sa ilang bug-at nga kalapasan sa balaud ug dignidad sa pagkatawo.
Nabaniog na usab ning ulahi ang pag-upload sa special media sa law-ay ang video sa grupo sa mga batan-ong lalake nga namastamas sa babaye nga nawad-an og panimuot tungod sa tumang kahubog. Sumala pa, mga tinun-an sila sa senior high sa mga pribadong unibersidad sa dakbayan sa Sugbo.
Dili kini bag-ong kaso. Nahitabo na kini kaniadto. Ang nakalahi lang ning panahona tungod sa grabe na kasayon ug kapaspas sa komunikasyon sa soial media tungod sa teknolohiya sa internet nga pundasyon sa daghang flatforms sama sa Facebook.
Pareho og gibug-aton sa resulta kon gamiton kini sa maayo o dautang tumong human igo lang moproseso ang teknolohiya, ekipo o gadgets apan, ang paghunahuna sa pagpalihok naa sa tawo nga nga naggamit niini, hamtong na o batan-on pa.
Gani ang mga tagdumala sa social media naningkamot nga dili magamit sa dinautan ang ilang platform, apan dili hingpit ang tanan, may makalusot gihapon. Sama sa pag-post sa law-ay nga video gi-delete na sa Facebook apan daghan na ang naka-download ug napasapasa gihapon.
Panawagan: Dili nato ipasa ang susamang materyal.
Dakong hagit kini sa kabag-ohan sa panahon. Ang sulbad ning tanan mobalik sa batakang pamaagi, ang pagpakusog sa edukasyon. Subay niini, nagpabilin ang dakong papel sa eskuwelahan ug mga magtutudlo, labi na sa high school, ug mga ginikanan, guardians o katiguwangan.
Ang ulahing kontrobersiya sa video pagpamukaw kanatong sa tanan. May susama pa diayng paghitabo sa palibot? Kinahanglan magpadayon sa pagpakabana ug paggiya sa mga bata.