40 ka convicts dad-on sa Abuyog

MIABOT na og 40 ang ningtahan sa Criminal Investigation and Detection Group 7 nga naka benepisyo sa Good Conduct Time Allowance (GCTA)law.

Sila dad-on sa Leyte Regional Prison sa lungsod sa Abuyog, karong adlawa aron sila kasamtangan nga ipahimutang ug subayon pagbalik ang ilang records kon husto ba ang kwentada sa ilang sentensya.

Matod ni Police Brigadier General Debold Sinas nga personal nga nibisita sa buhatan sa CIDG 7 nga isakay sila sa barko gikan sa Siyudad sa Sugbo.

Ang Police Regional Office (PRO) 7 ang mogasto.

“Ang desisyon namo nga kini sila, i-transfer ugma sa alas 10 sa buntag (Miyerkules, Septiyembre 18) sa roro adto didto sa Abuyog sa Leyte,” matod ni Sinas.

Di na siya gusto pa nga malangay ang paghatod sa mga ni-surrender sa ilang kaugalingon ilabi na nga kinahanglan na sila nga mahuman sa ilang mga dokumento.

Ang CIDG 7 ug kapulisan sa siyudad sa Sugbo aduna nay listahan sa tanang taga Sugbo nga nakabenepisyo sa GCTA apan wa lang una motug-an ang kapulisan kon pila.

Matod ni Police Lieutenant Colonel Hector Amancia nga ila pang subayon kon naa pa ba kini sa Sugbo ang mga ngalan tungod kay ang uban niini nabalhin ang address.

Si Nemesio Bacalso, 66, taga Carmen, Bohol nanawagan sa iyang maguwang nga naa sa Barangay Guadalupe nga si Inaro Bacalso nga sa di pa siya dalhon sa Leyte, bisitahon siya sanglit sukad sa iyang pagkabata wa pa sila magkita.

Nabilanggo siya sa kasong rape niadtong 1989 ug pagka Pebrero 2019 nakagawas sa New Bilibid Prisons tungod sa GCTA law.

“Sana mabisita mo ako dito sa CIDG bago pa ako dadalhin sa Leyte. Mula bata pa ako di na kami nagkikita ng kapatid ko na nasa Guadalupe,” matod ni Nemesio.

Adunay personnel ang mo-escort kanila paingun sa Abuyog aron mohatag kanilag security apan wala mo klaro si Sinas kon pila ka mga pulis ang iyang ipadala. (AYB)