ORMOC City, Leyte -- Gikompirmar sa Department of Agriculture (DA) nga way naitala nga kaso sa African Swine Fever (ASF) ning Dakbayan taliwa sa pagdeklarar sa Department of Agriculture og outbreak sa mao nga sakit sa baboy.
Giklaro usab sa Kagamhanan sa Siyudad nga ang supply sa baboy sa Leyte kasagaran nagagikan sa Mindanao.
Matod ni Dr. Emestine Ibañez sa Regional Agriculture Office 8, nakadawat sila og report nga dunay pipila ka mga baboy sa Barangay Labrador sa Ormoc ang nangamatay.
Naalarma ang DA niadtong higayona gumikan kay duna nay mga baboy sa Bulacan ang nangamatay ug nagpositibo sa African Swine Fever.
Gikuhaan og laboratory sample sa DA ang mga baboy ug gipaubos sa eksaminasyon sa kaulohan.
Nigawas sa resulta sa eksaminasyon nga di ASF ang namatyan sa mga baboy sa Labrador kundi gumikan sa laing matang sa kagaw.
Gipaneguro hinuon sa DA nga di gihapon sila magkampanti bisan way natalang kaso sa ASF sa Eastern Visayas o Region 8.
Task Force
Ang Lokal nga Kagamhanan sa Ormoc City niumol og ASF Task Force para sa pagpatuman og mga action plan ug ubang lakang aron mapugngan ang pagsud sa ASF.
Matod ni City Councilor Tomas Serafica, sagad sa mga baboy nga niabot sa Ormoc gikan sa Mindanao.
Dugang ni Serafica nga wa hinuon siyay nakita nga abnormalidad sa suplay ug presyo sa baboy sa dakbayan bisan ning maong hulga.
“Walay naitala nga kaso sa Ormoc pero kinahanglan gihapon ta tanan magbantay kay dako kaayo ang epekto niini sa ekonomiya kon simbako makasud ni,” pasabot ni Serafica.
Giawhag usab ni Serafica ang mga awtoridad nga magbantay sa tanan nga mga poultry products nga ipasulod sa Dakbayan sa Ormoc.
Makigtagbo usab ang task force sa pribadong sektor para mas mapalapdan pa ang pagpasabot bahin sa kaso.