GITIWAS og guba sa Prevention Restoration Order Beautification Enhancement (Probe) ang 15 ka mga estruktura sa sityo Bato, Barangay Ermita nga salin sa sunog niadtong Pebrero 2019.
Human sa sunog, nagpabilin sila sa ilang gibakwitan.
Si Raquel Bohol-Arce, pangulo sa Probe, nagkanayon nga gideklarar sa Office of the Building Official nga delikado na ang 15 ka mga balay nga puy-an hinungdan nga ilang giguba ubos sa mando sa Office of the Mayor.
Ang pangulo sa Probe nagkanayon kapin 200 ka mga balay ang nasunog niadtong Pebrero diin ang Division of the Welfare for the Urban Poor (DWUP) wa makapahigayon og re-blocking sanglit kuwang sila sa koordinasyon sa barangay.
Way pagsupak ang mga tag-iya sa mga balay sanglit sila mismo nahibawo nga dilikado na nga puy-an ang maong mga estruktura.
Ang mga nagpuyo sa kapin 200 ka mga balay nga nasunog nipuyo daplin sa dalan ML Quezon ug ang uban naa nipasilong ilawom sa wala mahuman nga Unit II sa Carbon Public Market.
Gipadayag ni Arce nga gumikan sa pagkalimpyo na sa lugar inabagan sa mga heavy equipment sa Department of Engineering and Public Works (DEPW), ang DWUP nga gipangulohan ni Simeon Romarate makasugod na pagpahigayon sa re-blocking.
Sa re-blocking, ang tanang pamilya nga nasunogan makabalik og tukod sa ilang mga balay apan makuhaan og pipila ka metros ang sukod sa ilang orihinal nga balay sanglit butangan na og road right of way.
Si Mayor Edgardo Labella gusto nga makabalik na ang mga nasunogan para dili na sila mag-antos sa kalisod sa ilang sitwasyon daplin sa dalan ug ilawom sa wala mahuman nga edepisyo sa Carbon. (PAC)