HUMAN sa duha ka semana sukad naimplementar ang clamping ug clearing operations sa Mandaue City, 74 na ka mga sakyanan ang na-clamp sa Traffic Enforcement Agency of Mandaue (TEAM) hangtod sa Septiyembre 13.
Gisugdan pagpatuman ang clamping ordinance niadtong Septiyembre 1.
Ang maong ordinansa giimplemetar aron sa paglig-on sa pagpatuman sa balaod trapiko batok sa pagpataka og parking sanglit ang Mandaue maoa ang agianan sa mga sakyanan nga mopaingon sa siyudad sa Sugbo, siyudad sa Lapu-Lapu ug sa amihanang bahin sa Sugbo.
Gituohang ang pagpataka og parking mao ang usa sa mga hinungdan kung nganong muhinay ang dagan sa trapiko sa maong dakbayan.
Sigon sa TEAM nga ikaduhaon o ikatuloon ang numero sa mga sakyanan sa na-clamp ang gidaghanons sa mga nadakpan og na-isyuhan og ticket tungod sa pagpataka og parking.
Adunay 200 ka mga bag-ong clamping device nga gipalit ang Dakbayan sa Mandaue isip suporta sa pagpalig-on sa pag-implementar sa clamping ordinance.
Baynte kwatro oras ang operasyon sa Team batok sa illegal parking gikan sa Lunes hangtod sa Dominggo.
Trip cutting
Giabli na sa Team ang ilang linya para sa mga reklamo kabahin sa trip cutting.
Matod ni Arnold Malig-on, Command Center Traffic Monitoring in-charge sa Team, sila niapod-apod og gagmayng papel nga adunay mga numero sa telepuno ngadto sa mga pasahero aron mamahimong mo-contact sa Team kon makasaksi sila nga ang ilang jeep nga nasakyan nag-trip cutting.
Kalabot sa trip cutting, mao sab ang di pagsunod sa ilang rota labi na kadtong molihay sa rota aron mo-shortcut.
Ang kasagaran sa mga rota sa jeep nga mag-trip cutting mao ang Talamban-Mandaue- Consolacion.
Sa panahon nga makadawat ang Team og reklamo gikan sa mga pasahero, moisyu kini og ticket ngadto sa drayber nga nag-trip cutting.
Kon motestigo ang pasahero nga mireklamo human niini, kini iduso ngadto sa Land Transportation Franchising and Regulatory Board (LTFRB). Ang mga naisyuhan makamulta og P1,000.
Mokabat ngadto sa 20 ang madakpan kada semana tungod sa pagtrip cutting.
Para sa mga reklamo kabahin sa pagtrip cutting, mamahimong motawag ang mga pasahero sa 345-4176 o sa 230-4500 o mamahimong motawag og mo-text sa 09434216258 o sa 09158886534.
Sa mga moreklamo, kinahanglan nga lakip sa info nga ilang i-send mao ilang ngan, plate number sa sakyanan ug ang rota sa sakyanan.