GIPAUBOS sa kinalit nga drug test ang moabot sa 55 ka mga personnel sa City Disaster Rick Reduction and Management Office CDRRMO sa kagamhanan sa dakbayan sa Lapu-Lapu kagahapon, Septiyembre 17.
Ang naasoyng mga personnel gipa-ubos sa drug test aron pagsiguro nga walay tiggamitan ug ginadiling drugas sa naasoyng buhatan.
Tanan hinuon mipaubos sa drug test sanglit aduna may training ang mga personnel dihang gipakalitan sa drug test.
Matod sa executive director sa City of Lapu-Lapu Office of Substance Abuse and Prevention C-Losap nga gipili nila ang CDRRMO sa pagkakaron sanglit mi-request niadtong Lunes ang pangulo sa CDRRMO nga si Nagiel Bañacia sa pagpa drug test sa iyang mga personnel.
Kun ugaling adunay mag positibo mag-agad ra si Lao ngadto kang Lapu-Lapu City Mayor Junard “Ahong” Chan kung tugotan pa ba sila nga makapadayon pagtrabaho sa city hall.
Apan alang kang Lao iya kining irekomendar nga angayan mag leave sa trabaho ang mag positibo aron mapaubos sa unom ka buwan nga rehabilitasyon ubos sa iyang buhatan.
“Bisag di ta makadawat ug request to a certain office mag drug test gyud ta” matod ni Lao.
Sa pagkakaron wala pa kaayo kahunat ang pagpahigayon ug drug test sa mga buhatan sa dakbayan sanglit wala pa sila hingpit nga maka outsource ug laing mga drug test center nga makatabang sa ilang kampanya.
“Sa city health limited raman gud ang ilang (drug test) kit in a day so maayo mag outsource ta, so once magawas na ang notice of award buylo-buylo na ta sa atong drug test” matod ni Lao. (GCM)