MGA manindahay sa Tabunok market nagreklamo sa kahinay sa palit human gipatuman nga higpit nga polisiya kalabot sa parking ug uban pa.
Bisan pa man nahinangop sila sa kahamugaway sa merkado ilabi na usab nga niminus ang krimen.
Dul-an sa P10,000 na ang nawala nga kita ni Ginang Antonia mamaligya-ay og bugas sa Tabunok public market nga anaa ra daplin sa dan.
Iyang gitumbok maglisod na og park ang ilang mga suki.
Ingon man sa mamaligyaay og ukay-ukay, nga si Roselyn nga nakasinate sa maong kalisdanan.
Diin kaniadtong lahos na nga makaparada ang ilang mga suki nga mag-motorsiklo diha sa gawas sa ilang gitindahan.
“Apektado, kay naa man gud signboard diha nga no parking ug clamping. Uban mahadlok mo-park aron mopalit, mao ng nihinay gyud among halin,” tug-an ni Antonia.
Naapektuhan
Alang sa mga naninda sa sulod nga bahin sa Tabunok Market nihinay usab ang kita sama nalang sa manindahay og utanon ug karne.
Apan usa sa ilang gitudlo nga nakaminus mao ang mga kompetensiya nga anaa gawas sa merkado.
Hinuon ilang gipadayag nga uyon usab sila sa gipatuman nga paghawan sa sidewalk ug strikto nga dili pagparada sa daplin sa dan o sa mga sidewalk.
“Nindot man sad ni ingon ani kay hamugaway, dili na traffic, makalakaw na gyud diha sa sidewalk. Pero butangan lang siguro og loading ug unloading,” dugang pasabot sa mga manindahay.
Tagana og oras
Nitagana ang CT-TODA og oras alang sa pagkarga ug diskarga sa mga paninda, gikan sa 11:00 sa buntag hangtud sa 4:00 sa hapon diha sa daplin sa dan.
Gani Martes sa buntag, Septiyembre 17, nakigtagbo si Jonathan Tumulak, pangulo sa City of Talisay Traffic Operations Development Authority (CT-TODA) sa mga tindahan nga nagkinahanglan nga magpakarga ug diskarga sa ilang paninda alang niini.
Kadtong molapas na sa gikatakda nga oras sa loading ug unloading sa paninda, kon anaa nag-park sa daplin sa dan, ang sakyanan o truck de karga ang sikupon.
Gitug-an usab nila Arnie Dela Torre, Market consultant ug Winnie Bas ang Market administrator nga nihimo sila og lina-in nga tigum sa nagkadaiyang section sa manindahay sa Tabunok Market, alang sa pagpaminaw sa ilang yangungo.
Mga tanod ug nagdugang sila og team sa Market taskforce aron motabang sa pag-monitor ug pag-roving sa lugar.
Aduna nay kinatibuk-an nga 800 ka manindahay angTabunok market. Kahinumduman nga gisugdan ang strikto nga pagpatuman sa dili pagparada sa mga daplin sa dalan ug gihawanan ang mga sidewalk sa Tabunok market, niadtong sayong bahin sa Agusto. (FMD)