ANDAM na ang Cebu City Government sa tanang gikinahanglan alang sa ika-13 nga mass wedding diin 100 ka paresan ang kaslon, karong Oktubre 4, sa Redemptorist Church, dakbayan sa Sugbo.
Si Konsehal Niña Mabatid, chairman sa committee on women and family affairs (CWFA) nihulagway nga kini maoy labing engrande nga mass wedding nga ipahigayon sa siyudad.
Matod ni Mabatid nga nakig-alayon sa Cebu City Women and Family Affairs Commission alang sa preparasyon nibutyag nga niining kalihokan, masinati sa 100 ka paresan ang ti-unay nga diwa sa pagpaso ug selebrasyon sa bag-ong kasal.
“This is the 13th year sa atong mass wedding ug first time ni siya nga grand kaayo ang selebrasyon, nindot ang venue sa reception kay adto ipahigayon sa Cebu City Waterfront Hotel ug first time nga i-allow nato ang parents to join the mass wedding,” matod pa ni Mabatid.
Ang matag paresan, maka-angkon og libreng wedding cake, wedding ring gikan sa Diagold, tagsa ka litson gikan sa City Government samtang ang reception ipahigayon sa Waterfront Hotel and Casino, Lahug, Cebu CIty.
Ang wedding ceremony sugdan sa 1:00 sa hapon sundan gilayon sa reception.
DOBLEHON SUNOD TUIG
Gipadayag sa chairman sa CWFA nga iyang paningkamotan nga mahimong 200 ka paresan ang makasal sunod tuig atol sa gihapon sa mass wedding nga itumong sa Setyembre 24.
Tuyo ni Mabatid nga ma-atiman ang ubang mga nag-live-in lapas na sa lima ka tuig ug mabendisyonan ang ilang pagpuyo.
Sa pagkakaron, ang City Government nigahin og P1 milyon para sa maong kasal ug sunod tuig, papundohan sa konsehal og P1.5 milyones alang sa 200 ka paresan.
Giangkon ni Mabatid nga kon subayon ang gasto, dili paigo ang maong kantidad apan nagpasalamat siya sa mga sponsor ug mga pribadong tawo nga nihatag sa ilang serbisyo nga libre aron matigayon ang maong “kasalan ng bayan” nga maoy labing una sa tandem ni Mayor Edgardo Labella ug Bise Mayor Michael Rama. (PAC)