SA TULO ka adlaw nga paglutawlutaw sa kadagatan sa managtiayong Caldino, ang ilang gisaligan mao ang mga lumot sa dagat nga maoy ilang gikaon ug nagpalig-on kanila aron mabuhi mao ang pag-ampo.
Inubanan sa ilang paghuna-huna sa lima ka mga anak, naka-survive ang magtiayon bisan luya na kaayo sila.
Mao kini ang asoy ni Olympia Caldino, 45, sa Superbalita Cebu sa ilang pag-uli dinhi sa Sugbo gikan sa Bohol sa Martes, Septiyembre 17.
Ang magtiayong Caldino nabangalan sa mga mananagat sa Albuquerque, Bohol niadtong Dominggo sa hapon.
Missing sila sukad niadtong Biyernes sa buntag human wa makadunggo gikan nga nanagat nianang kaadlawon.
Si Olympia nga nahinabi sa Superbalita Cebu niingon nga sa una, kahadlok nipatigbabaw kaniya labi na na nga naa sila sa kadagatan human nga gipanghapak sila sa dagkong bawod.
“Sa una, pwerte nakong hadloka jud og basin dunay iho labi na nga naa mi sa tunga sa dagat,” asoy ni Olympia sa Superbalita Cebu.
Si Olympia wa magtuo nga mabuhi pa sila kay naa sila sa tunga tunga sa dagat samtang nag-abay sa ilang banka nga una natiktyaob, apan wa malunod.
“Patay na gyud siguro mi, Sir, kon nalunod pa ang among banka nga gisakyan,” dugang ni Olympia. Nawala ang kahadlok ni Olympia sa dihang nahuna-hunaan niya ang ilang lima ka mga anak.
Nagsige na sila og ampo sa iyang bana tungod ug alang sa ilang mga anak.
Nag-ampo sila nga dunay makakita kanila ug maluwas.
Ang ilang gisaligang pagkaon mao lang ang mga lumot nga ilang makuha sa dagat.
Ingon sa nadungog na ang ilang pag-ampo dihang dunay usa ka barko nga milabay kanila apan layo-layo hinungdan nga wa sila makit-i.
“Sa among tulo ka adlaw, Sir, di nako masabot ang among gibati sa akong bana og unsay among buhaton,” matod ni Olympia.
Niadtong Dominggo sa hapon, gidungog ang ilang pag-ampo dihang nabangalan sila og usa ka mananagat samtang naggaid ang ilang bangka sa usa ka payaw.
“Dako gyud akong pasalamat, Sir, sa nagluwas namo tungod kay gitagaan pa gyud mi sa Ginuo og ikaduhang kinabuhi,” dugang ni Olympia.
Dihang giluwas na sila, wa niya kapugngi ang pagsige og hilak sa kalipay. Pinaagi sa abag sa Philippine Coast Guard ug sa Kagamhanan sa Oslob, nahiuli ang magtiayon nga gikuha sa ilang duha ka mga anak ug ni Barangay Konsehal Elsa Gifwold.