GIABISOHAN ang mga motorista nga moagi sa U.N. Ave. sa Dakbayan sa Mandaue nga mosunod sa bag-ong rota sa trapiko nga giimplementar aron sa pagpaspas sa dagan sa trapiko.
Si Architect Florentino Nimo Jr., executive director sa Traffic Enforcement Agency in Mandaue (TEAM), niingon nga ang tumong niining bag-ong pamaagi sa trapiko makapugong sa paghuot sa mga sakyanan nga moagi sa U.N. Ave. intersection.
“Taas-taas hinuon sya nga rota apan mahanoy gyud ang dagan sa trapiko,” dugang ni Nimor.
Base sa bag-o nga pamaagi, ang mga motorista nga mobyahe padulong sa amihanang bahin sa Sugbo gikan sa D.M. Cortes St. agi sa Cansaga Bridge og mo-U-turn sa agianan ilawom sa Marcelo Fernan Bridge.
Sa panahon nga mabalik na sa agianan ang mga motorista, mamahimo na silang moliko sa tuo paingon sa Cansaga Bridge, inay motabok sa intersection nga makamugna og trapik.
Ning bag-ong traffic scheme, mo-U turn sa ilawom sa ikaduhang bridge ang public utility jeepneys paingon sa norte pinaagi sa Jagobiao-Consolacion nga rota.
Ang mga bus ug mga sakyanan nga paingon sa norte gikan sa Cebu North Bus Terminal mo-U turn sab sa ilawm sa bridge inay nga moliko sa wala paingon sa Pacific Mall aron sab nga dili makaingon og trapik.
Ang mga paingon sa Siyudad nga gikan sa Cansaga Bridge kinahanglang moliko paingon sa tuo moagi sa U. N. Ave. ug dayon sa P. Burgos st. ug moliko sa wala paingon sa A.C Cortes st. ug mulahos ngadto sa D.M. Cortes St.
Magpahigayon ang Team og dry run karong Dominggo, ika-22 sa Septiyembre, aron masuta kon epektibo ba ang maong pamaagi.
Sigon ni Nimor nga tanang mga kabalaka ila nang masuta atol sa pagpahigayon niini sa dry run sa mga posibleng choke points ug pagdungan ang oras sa traffic lights ug uban pa.
Karong Sabado, Septiyembre 21, temporaryong pawngon ang mga traffic lights sa U.N. Ave. para itarong ang hardware settings sa pag-oras niini sa dry run.
Ang mga Team personnel, mga barangay tanod ug mga radio communication groups maoy magmaneho sa dagan sa trapiko samtang gi-shut down pa ang traffic sa alas 6 sa buntag hangtod sa alas 10 sa gabie.
Niingon si Nimor nga ang pag-implementar sa bag-ong rota usa sa mga kabalaka nga giisa sa Mactan Cebu Bridge Management Board (MCBMB).
Sa Martes, Septiyembre 17, niingon si Gov. Gwen Garcia, MCBMB chairperson, nga kinahanglan nga matagaan og solusyon ang trapik sa maong lugar aron ang mga turista nga gikan sa Mactan Cebu International Airport di mahatagan og bati nga impresyon sa Sugbo.
Base sa mga tala sa Team, 28,377 ka mga passenger unit cars ang moagi sa Marcelo Fernan Bridge paingon sa U.N. Ave. kada-adlaw.
Dugang sab ni Nimor nga makigtambayayong sila sa traffic management offices sa siyudad sa Sugbo, Lapu-Lapu ug lungsod sa Consolacion aron sa paghimo og mas tinibuok nga pamaagi sa trapiko. (RTF)