SAGOL professional ug amateur nga mga magduduwa ang molangkob sa Gilas Pilipinas men’s pool nga mohamag sa 30th Southeast Asian Games.
Nagkanayon si Samahang Basketbol ng Pilipinas (SBP) president Al Panlilio nga gisumiter na sa SBP ang 24-man pool ngadto sa Philippine Southeast Asian Games Organizing Committee (Phisgoc) bisan karon pang Septiyembre 30 ang deadline.
Wala gibutyag ni Panlilio ang tanang mga sakop sa 24-man pool apan iyang nahisgutan ang mga magduduwa sa Philippine Basketball Association (PBA) nga sila si Christian Standhardinger ug Stanley Pringle lakip na ang collegiate standouts nga sila si Thirdy Ravena ug Isaac Go.
“It is a way for us to develop other players,” matod ni Panlilio sa interbyu sa Spin.ph.
“If you see the mix of the players, may mga amateurs.”
Matod ni Ryan Gregorio, special assistant to SBP president, nga adunay mga kausaban sa national pool human sa resignasyon ni Gilas Pilipinas coach Yeng Guiao.
Gipasabot sa Phisgoc nga gumikan kay karon pang Septiyembre 30 ang deadline, aduna pa’y igong kahigayunan ang SBP nga makailis og magduduwa sa national pool.
“As we speak right now, my assessment is we are going to start from scratch and revisit and come up with a new [list],” pasabot ni Gregorio.
Kon ma-finalize ang tanan, mao kini ang labing unang higayon nga adunay mga magduduwa sa PBA ang mokombati sa matag duha ka mga tuig nga kompetisyon.
Sukad masukad, pulos amateur players ang gipadala sa Pilipinas alang sa SEA Games diin nakahakot kini og 17 ka mga kampiyunato sulod sa 19 ka mga edisyon.
Gitataw ni Gregorio nga mismong si SBP chairman emeritus Manny V. Pangilinan ang miinsister nga kinahanglang sagol professional ug amateur players ang ipadala sa nasod alang sa SEA Games.
“That’s definitely the combination. We want to have some youth movement also so we want to have some collegiate players and get the necessary experience,” dugang ni Gregorio.
“Kailangan rin may veteran leadership that we can get from the PBA.”
Sa SEA Games, sila si Pringle ug Standhardinger gitugtan nga makaduwa nga local players dili sama sa FIBA tournaments diin makaduwa lang sila kon himuong naturalized players.
Wala pa makapili og headcoach ang SBP alang sa national team.
Ang 30th SEA Games, nga ipahigayon sa Pilipinas, gikatakdang sugdan karong Nobiyembre 30. (ESL)