TULO ka mga sakyanan ug usa ka balay ang nangasunog sa duha ka managlahing mga sunog sa Martes sa buntag, Septiyembre 17, sa Dakbayan sa Sugbo.
Pasado alas 7 sa buntag sa dan Jakosalem, eskina dan Benedicto, kalit nga nisilaub ang atubangan sa usa ka awto nga gimaneho ni Louie Dichos, lumolupyo sa Lopez Compound sa R. Joaquino st., Siyudad sa Sugbo.
Matod ni Dichos, wedding photographer, nga samtang siya nagmaneho kini sa iyang sakyanan paingon unta sa Barangay Mabolo, nisilaub ang makina sa iyang sakyanan.
Niagi niadtong tungura si P/Capt. Saturnino Sedigo, hepe sa Highway Patrol Group (HPG) Metro Cebu ug gigamitan og fire extinguisher mao nga napawong dayon.
Awhag ni Sedigo sa tanang mga drayber og four-wheeled nga mga sakyanan sa pagtiner og fire extinguisher aron dunay magamit sa samang hitabo.
Mga alas 10 pasado sa buntag, gialarma na usab ang kabomberohan sa laing sunog.
Si SFO3 Lowell Opolentesima, chief investigator sa Cebu City Fire Department, niingon nga ilang nadawat ang alarma sa sunog alas 10:15 sa buntag sa Sitio Tugas,La Paloma Village, Barangay Tisa, Siyudad sa Sugbo.
Matod ni Opolentesima nga base sa ilang imbestigasyon, naangin ang duha ka mga sakyanan sa pagdaob sa tinapok nga mga layang dahon nga gidauban.
Apan tungod sa huyohoy sa hangin, ang mga aligato nanglupad ug giingong napadpad paingon sa duha ka mga sakyanan dayon niulbo ang kayo.
Napagan ang usa ka balay nga anaa sa duol.
Naugdaw ang Mitsubishi L-300 van ug Honda CRV nga iya ni Honorato Vequilla.
Nikaylap ang kayo sa duha ka mga sakyanan sa balay sa silingan. (BBT)