PABILIN pa gihapon nga taas ang kaso sa dengue kumpara sa nilabay nga tuig sa susama nga yugto gikan sa bulan sa Enero hangtod sa Septiyembre.
Anaa sa 84 ang natalang patay sa Northern Mindanao diin ang ihap sa nataptan anaa sa 21,457 gikan bulan sa Enero hangtod Septiyembre 14.
Ang Bukidnon ang dunay pinakadaghang kaso nga anaa sa 8,077 kon anaa sa 38 porsiyentos.
Nagpabilin pa gihapon nga dunay pinakadaghang kaso sa namatay mao ang Lanao del Norte nga anaa sa 18. Gisundan kini sa Misamis Oriental nga dunay 17; Iligan City, 15; Bukidnon, 13; ug Cagayan de Oro ug Misamis Oriental dunay 10, ug usa sa Camiguin.
Atol sa press conference sa Department of Health (DOH)-Northern Mindanao kagahapon, gibutyag ni Dr. David Mendoza, OIC, Director III, nga bisan pa man nga paubos na ang kaso karong panahona, apan pabilin pa kining taas kumpara sa nilabay nga tuig.
"January to September, still our cases increase by 64 percent compared to last year of the same period," matud ni Mendoza.
Nagpasalamaton usab kini tungod kay niubos na ang ihap sa natalang nataptan sa dengue sa Northern Mindanao.
"Didto sa early August, nag-start na og go down ang atong kaso, and we're happy for that maybe because our advocacy has already sink in to the community," dugang ni Mendoza.
Apan, giklaro niini nga sa adbokasiya nga 5s bagsak pa gihapon tungod kay pasado lang sa S3 nga mao ang 'seek early consultation' rason nga daghan og kaso nga natala.
Padayong nanawagan ang DOH nga tumanon ug panghingusgan pa ang 5s: 1.) Search and destroy mosquito breeding sites; 2.) Self-protection; 3.) Seek early consultation; 4.) Support fogging, spraying, and misting in hot spot areas; ug 5.) Sustain hydration o sama sa pagpangita sa mga posibleng maitlogan sa lamok, proteksiyonan ang kaugalingon, suportahan ang fogging sa hot spot area ug pabilin ang hydration.