NASAPON sa kapulisan ang menor de edad nga gikatahong mosulod sa mga balay ug mangawat dayon motago sa mga pipeline pagawas niadtong Lunes, Septiyembre 16, sa Gran Europa, Barangay Lumbia, Cagayan de Oro City.
Gidala na sa kapulisan sa Police Station 8 (PS8) sa Lumbia ang duha ka nag-edad og 16 ug 17, pulos taga Macanhan, Carmen sa Tahanan ng Kabataan.
Sa pakighinabi kang Police Captain Dennis Ebsolo, hepe sa PS8, gibutyag nga gapanulod ang maong mga menor de edad sa mga balay ug molusot sa pipeline, apan walay swerteng nasapon kini human gikataho sa ilang buhatan.
Giingong duna kini silay agianan nga dili mamatikdan sa guwardiya, ilabi na nga dako ang maong dapit aron nga makasulod ug bantayan lang nga wala nay tawo ang mga balay.
Nakuhaan usab ang 17-anyos og mahait nga hinagiban atol sa pagkasikop.
Ang maong insidente ang nakatala na sa nahisgutang buhatan alang sa tukmang aksiyon.