DAGHAN ang giingong namalik sa pakiglambigit sa ilegal nga druga ilabi na diha sa mga barangay.
Kini giingong tungod usab sa nagkaluya nga programa sa gobyerno.
Nagpadangat og special report si Konsehal Roger Abaday atol sa nilabay nga sesyon kini tungod sa giingong daghang nibalik kay wala mapadayon ang mga programa sama sa City Anti Drug Abuse Council (Cadac) ug Community-Based Rehabilitation Program (CBRP) sa mga barangay.
Gibutyag ni Abaday nga anaa sa 56 ka mga barangay ang dili aktibo diha sa maong programa sa gobyerno, ilabi na ang CBRP.
Sa pakighinabi kang Abaday, giingong naluya ug nangatulog ang mga naglihok sa kampanya batok sa ilegal nga druga.
"Daghan kaayo nangatulog. Wala man naglihok sa ilang kampanya sa druga. Nibalik na sab. Wala nila gi activate ilang Cadac ug ang ilang Community Base Rehabilitation Program," matud ni Abaday.
Gidugang pa nga dunay mga na-cleared na nga mga barangay, apan pipila lamang kini, samtang ang uban wala nagduso og mga report kalabot na niini sama sa watchlist nga maoy basehan sa tinugyanan sa Philippine Drug Enforcement Agency (PDEA) sa ilang mga pag-monitor.
"Few barangays lang ang nagpadayon sa ilang programa," dugang pa.
Buot usab niini nga mismo ang Department of the Interior and Local Government (DILG) ang mag-isyu og memorandum aron nga mamahimong aktibo pagbalik ang mga programa alang sa mga nalambigit sa ilegal nga druga nga nipailalom sa rehabilitasiyon.
"I-reactivate lang ang Cadac ug ang community-based. Isyuhan gyud sila sa DILG og memorandum para makatawag sila, ma-meeting sila," matud ni Abaday.
Giingong pinaagi niini, mapatawag ang mga punong barangay ug vice tsirman aron kini mahisgutan ug mapadayon ug mamahimong aktibo pagbalik ang maong mga programa.