NAKABSAN sa kinabuhi sulod sa balay tambalanan ang usa ka 6-anyos nga bata human nalumos sa swimming pool sa Barangay Solana, lungsod sa Jasaan, Misamis Oriental.
Giila ang biktima nga mao si Hilson A. Alaod, taga Dalirig, lungsod sa Manolo Fortich, Bukidnon.
Sa inisyal nga imbestigasyon sa Jasaan Police Station, nasuta nga kuyog sa bata iyang pamilya kay nagselebrar ang apuhan og birthday niini.
Giingong dili kini kabalo molangoy ug anaa nagligo sa four feet nga bahin sa swimming pool sa Spring View Resort.
Gani gitabang pa kini sa life guard ug nakasuka apan dihang gidala sa Jasaan Community Hospital, gideklarar nga patay ni Doctor Stephanie Ann Marie Ermac.
Ang patayng lawas sa biktima gidala na og balik sa Manolo Fortich karon panahona.