SUPERBALITA CEBU

100 ka balay naugdaw

TULO ka mga sitio sa Barangay Basak Mambaling, Siyudad sa Sugbo naigo sa sunog nga niugdaw sa gibana-banang mga 100 ka balay sa Miyerkules sa udto, Septiyembre 18, 2019.

Kapin sa 500 ka mga tawo ang nawad-an sa ilang mga pinuy-anan. Mokabat sa P700,00 ang gibana-banang danyos.

Igo na lang sa paghilak ang 30 anyos nga si Cherryl, human nga mao na lay iyang naabtan ug nakita ang ilang naugdaw nga balay.

Nahabilin niini ang iyang nga dokumento ug passport nga gamit unta sa iyang paglarga sa Australia sa sunod buwan.

Ang balay nila ni Cherryl ang nalakip sa 100 ka mga balay sa mga Sityo Wang-yu, Abbya ug Ipil-ipil.

“Wala gyud koy nakuha, gikan gud ko sa Colon, naay mga gipamalit, para pagpangandam (sa larga). Gitawgan na lang ko ni Papa nga nasunog apil among balay,” naghilak nga saysay ni Cherryl sa Superbalita Cebu.

Gitug-an ni Mambaling konsehal Seller Salvador nga ang tulo ka mga sitio adunay kapin sa 100 ka mga balay, diin ang grabe nga naapektuhan ang sitio Wang-yu ug Ipil-ipil.

Ang mga balay sagad hinimo sa mixed nga kongkreto ug light materials.

Nadawat sa kabomberuhan ang alarma alas 11:07, gipaubos kini sa second alarm alas 11:13 ug pagka alas 11:26, giisa dayon sa task force Alpha.

Nadeklarar sa Cebu City Fire Station nga kontrolado ang sunog alas 12:05 sa udto.

Matod ni Senior Fire Officer 3 Oliver Tautho, fire investigator, nga nagsugod ang kayo sa balay ni Mamerto ‘Anjun’ Ravina Jr.

Usa sa ila gisusi nga hinungdan sa sunog mao ang kuryente human nga giingong nakita sa mga saksi nga sa kisame nagsugod ang kayo.

Gisusi usab ang taho nga tungod sa adunay nagluto.

Matod usab ni Antonieta Ladungga, kinsang balay ika-upat gikan sa balay diin nagsugod ang kayo nga natulog siya sa ilang lawak sa dihang mao nalang iyang nadunggan ang syagit sa mga silingan nga adunay sunog.

“Akong nadunggan nga niingon man nga nagduwa daw ang mga bata og kayo, nya kana ilang negusyo gud, unlan mana ug mga foam ba, mga punda, mao na kon naay kayo, siguro mao to nakadaku,” asoy ni Ladungga.

Apan giklaro ni Tautho nga gipaubos pa tanan sa imbestigasyon kon unsa ang hinungdan. Wa hinuoy gikataho nga nakalas sa sunog.

Kasamtangan naa ang mga biktima sa Abbya gym ug Viking gym sa barangay.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph