SUPERBALITA CEBU

Lancers mobawi batok Wildcats

MGA duwa karon:

5:15 pm- USPF batok UV (High School)

6:45 pm- CITU batok UV (College)

Mobangon og suway gikan sa pagkapandol ang defending champions University of the Visayas (UV) Green Lancers sa ilang pagpakigbatok sa Cebu Institute of Technology University (CITU) Wildcats sa main game karong gabii sa Cebu Schools Athletic Foundation Inc. (CESAFI) basketball college division sa Cebu Coliseum.

Sa wala damha, ang Green Lancers ni coach Gary Cortes nasugamak sa makapakurat nga kapildihan batok sa University of Cebu (UC) Webmasters, 72-64, niadtong Septiyembre 15 nga maoy nagtukmod kanila sa 1-1 nga rekord.

Ning kombatiha, gilauman nga ihabwa sa Green Lancers ang ilang kapungot ngadto sa Wildcats, nga wala pa’y daog sulod sa duha ka mga duwa.

Apan dili angayang molugak bisan gamay ang Green Lancers gumikan kay bisan wala pa sila nakatilaw og daog, gipakita sa Wildcats nga aduna sila’y ikasukol bisan sila ra’y bugtong team nga wala’y import ning maong torneyo.

Nakapanghudlat ang Wildcats ni coach Edsel Vallena una sila mingyukbo batok sa University of San Jose Recoletos (USJ-R) Jaguars, 72-67, sa premiro nilang duwa niadtong Agusto 31 atol sa unang adlaw sa kompetisyon.

Sa ikaduha nilang tahas niadto lang Septiyembre 17, nakapanghudlat gihapon ang Wildcats una sila napukan sa University of San Carlos (USC) Warriors, 81-74.

Ang Green Lancers mosandig og maayo sa katakos nila ni Jancork Cabahug, Micahel Maestre, Gileant Delator, Jan Soliva ug import Lassina Coulibaly.

Sa ilang bahin, ang Wildcats pangulohan nila ni Jesse Alolo Jr., Jemcerson Sable ug Adrian Con-ui.

Sa high school division, ang UV Baby Green Lancers gilaumang mosagubang og malisod nga tahas batok sa University of Southern Philippines Foundation (USPF) Baby Panthers sa premirong duwa.

Grabe ka taas ang moral sa Baby Panthers gumikan kay gikan sila sa dakong kadaugan batok sa usa sa mga inilog nga mao ang University of San Jose Recoletos (USJ-R) Baby Jaguars, 71-64.

Ang Baby Panthers kasamtangang naggunit og 2-0 nga rekord samtang ang Baby Green Lancers adunay 1-1 nga baraha. (ESL)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph