MIPAULBO og 35 puntos si King Osabel aron ituboy ang 2013 District ngadto sa 89-70 nga kadaugan batok sa 2009 Legacy sa nagpadayon nga University of San Carlos-North Alumni Basketball Club Cebu City Mayor’s Cup Division 3 sa USC Boys Gym sa Gen. Maxilum Avenue, dakbayan sa Sugbo.
Gawas sa iyang puntos, si Osabel nakalangkat og 12 ka rebounds, duha ka assists ug laing duha ka steal nga igo na kaayong nakapahimo kaniyang best player of the game sa ilang ikatulong daog sa upat ka mga duwa.
Gikatabla na karon sa District ang Sharks alang sa unang dapit sa ilang division.
Girehistro usab sa 1988 Barako ang ilang 3-1 nga baraha human kini makaipsot sa mga kamot sa 1987 Bros, 61-56, ubos sa pagpangulo ni Dindo Sausa nga may 27 puntos ug unom ka rebounds sa Seniors Division.
Samtang sa Division I, gilubong sa 1995 Pirates ang 1992 Little Rascals, 63-49, nga maoy ilang unang daog sulod sa upat ka duwa.
Si Emerson Jaime ang nangulo sa Pirates nga may 25 puntos ug napulo ka rebounds.
Ang 2002 Goats nga misandig sa 18 puntos ni Joel Dinawanao, nagpabiling wala pay pildi sa tulo ka duwa human nila masungay ang 2005 Chameleons, 68-57, sa Division II.
Gibuntog usab sa Ninety Niners ang 1994 Bulldogs, 77-65. Si Joseph Bragat mipakatap og 32 puntos ug 10 ka rebounds sa maong kadaugan.
Ang 2011 Sharks yano ra usab nga mitukob sa 2007 Waybus samtang gipatidpatiran sa 2003 Stallions ang 2001 Builders, 66-42.
Gilubong og taga li-og sa 1996 Chubbies ang 1993 Dragons, 64-48, ug gilat-anan sa 2004 Rebels ang 2002 Lions, 65-58. (JBM)