SO, GIPATUBAG na karon sa Games and Amusement Board (GAB) ang Panamanian boxing judge nga si Carlos Costa kinsa gipasakaan og reklamo sa mga boxing officials sa nasod.
Si GAB chairman Abraham “Baham” Mitra, mitug-an sa Superbalita nga ila nang gihatagan og kopya si Costa aron makuhaan sa iyang habig isip kabahin sa ilang imbestigasyon.
“Na forward na sa kanya, Sir. We have sent him complaints and just awaiting his response. Then we’ll ask those mentioned to comment, then the board decides.”
Kini maoy tubag ni Mitra sa among binayloay og message, pinaagi sa social media.
“The legal department has forwarded it to him,” dugang niya.
Sa niaging buwan, nakadungog na kita og kasikas kalabot niini, pero niadto lang Septiyembre 2 ang Associaiton of Philippine Professional Boxing Ring Officials (APPROBA) ug ang Professional Boxing Officials of Central Visayas (PBOCV) hiniusang mipasaka og petisyon batok sa giingon nga Cebu-based Panamanian boxing judge.
Mireklamo ang mga local boxing judges kay kini si Costa mao na hinuoy perming mahatagan og assignment sa bisan asa nga mga fight. Gani ila usab nga gitumbok nga manapaw og assignment.
Dugang sa alegasyon nga gigamit usab niini ang iyang pagka online sportswriter sa paghaylo sa mga boxing promoter.
Sa ato pa, kon ang ubang mga local judges magbaton og respeto ngadto sa ilang mga counterpart sa ubang region, kini si Costa way pakialam. Basta lang maka-judge siya.
Laing lehitimo nga reklamo mao nga pipila ka higayon nga kini si Costa mo-second sa mga Mexican fighter nga moaway dinhi sa nasod nga unta usa man siya ka judge.
Dunay linahi nga incident report si Oliver Evangelista sa GAB Boxing and Contact Sports Division. Niadtong Agusto 24 atol sa weigh-in sa Boxing Promotion ni Gerry Penalosa namugos ug gisukmatan kuno ni Costa ang GAB nga hatagan siya og daghang assignment sa pag judge gawas sa ABF championship.
“I write good things about GAB and in return official like me must be assigned to this boxing event,” pagkutlo ni Evangelista sa gipamulong ni Costa ngadto kanila.
Dunay lig-ong punto ug basehan kining gipasaka nga petisyon sa mga boxing officials ug kini maoy susihon karon ni Mitra.
Hinaot nga dili lang kutob ngadto ni Costa ang imbestigasyon ni Mitra kay ako nagtuo nga dunay kapit kini si Costa nga anaa ra usab sa GAB.
Dili ba ang taga GAB man ang magbuot sa assignment sa mga judges? Ang-ang man og molingkod lang na si Costa nga way pagtugot sa GAB.
Wa ba diay hatagi og warning si Costa nga isip usa ka judge gidid-an siya nga mag-second sa usa ka boksidor - local man o langyaw? Nganong makaako man si Costa sa pagpaningka sa GAB officials aron lang mahatagan siya og pabor?
Kini maoy gusto usab natong masayran. (jun.migallen22@gmail.com)