NANGAYO og pasaylo si Samahang Basketbol ng Pilipinas (SBP) chairman emeritus Manny V. Pangilinan sa mangil-ad nga kampanya sa Gilas Pilipinas sa miaging 2019 Fiba Basketball World Cup sa China.
Hinuon malaumon si Pangilinan nga makapakita og maayong kampanya ang Gilas Pilipinas karong 2023 diin usa ang Pilipinas sa mga host kauban ang Indonesia ug Japan.
Nagkanayon si Pangilinan nga kon adunay angayang basulon sa nahiaguman sa Gilas Pilipinas, wala’y lain kon dili ang SBP mismo.
“[Ang] masasabi ko lang is we are really sorry and we would like to really express our apologies to the Filipino people, kasi kasama naman kami doon,” matod ni Pangilinan nga napatik sa Spin.ph.
Ang Gilas Pilipinas nahiluna sa labing ubos nga puwesto sa World Cup diin wala kini nakatilaw og kadaugan sulod sa lima ka mga duwa.
“SBP is part of that program, it’s part of the decisions, the formation, and performance of the team. I think it’s our duty to apologize to our people for that performance,” dugang ni Pangilinan.
Isip co-host sa 2023 nga edisyon sa World Cup, ang Pilipinas dili na kinahanglang moagi og qualifying tournament gumikan kay aduna na man kini seguradong puwesto sa matag upat ka mga tuig nga kompetisyon.
Apan bisan pa niini, gitataw ni Pangilinan nga dili sila angayang molugak ug gani niini pa lang ka sayo, gusto na ni Pangilinan nga sugdan na nila ang preparasyon alang sa kompetisyon. (ESL)