Niñal: Lakaw

GI-CHECK nako ang app sa akong phone usa niaana ka adlaw. Matod pa ini: number of steps 13,671; walking distance 7 kilometers.

Pasabot, sa tibuok adlaw, trese mil kapin ang lakang nga akong nahimo diha sa syete kilometres nako nga gilakaw. Kini nga lakaw mao ang gitawag sa iningles og “brisk walking”, o kanang paspas nga paglakaw, usa ka klase sa exercise.

Matod pa sa akong nabasahan, nag-brisk walking ka kon samtang ikaw naglakaw kaya pa nimo ang pag-istorya apan di na nimo kaya ang pagkanta kay magkurog-kurog na man imong tingog og di na nimo maigo ang saktong tuno. Pasabot, paspas na ka kaayo imong pagginhawa.

Unsa ni akong gihisgotan? Usa kini ka klase sa app nga mo-monitor sa imong exercise - sa imong paglakaw, sa imong pagdagan, sa imong pagbisikleta, sa imong pag-gym, ug uban pa.

Ug matag pipila ka kilometro ug steps nga akong mahimo, adunay points nga matigom nga pwede nakong pailisan og libreng ticket sa sine, libreng kape, libreng phone load ug daghan pa.

Naay daghan nga sama ini nga app. Nakuha nako ning akoa sa akong pagpalit og insurance sa Philam.

Balik ta sa walking. Dugay na kong hilig og lakaw. Kon di ko magdali, maglakaw ra gyod ko kon asa ko padulong. Nahurot na tingali nakog lakaw ang tanang dalan sa atong syudad.

Mao nga kon nag-drive mo, o nag-taxi, unya inyo kong maagian nga naglakaw, ayaw intawon hunahunaa nga pobre na gyod kaayo ko nga wa na koy ikaplete sa jeep mao nga naglakaw na lang.

Ning bag-o lang bitaw, naglakaw ko diha sa may New Imus Road. Gisingot na ko pag-ayo, ug paspas kaayo akong paglakaw kay brisk walking lagi.

“Insooooy!” kalit lang nga naay misinggit. Paglingi nako, ako diayng kaila nga nag-drive sa iyang awto. Iya kong gihunongan. Ingon siya, “Luoya nimo oy, naglakaw ra man ka. Asa ka padung? Sakay diri, ihatod tika.”

“Ok ra ko bay, exercise gamay,” ingon ko. “Bitaw, sakay na diri, ihatod tika,” miingon na pud siya. “Ok ra lagi ko bay,” mitubag na pud ko, dayong ingon sa kaugalingon, “Samoka aning tawhana oy.”

Tan-aw niya nga seryoso ko, miingon siya, “Aw, ikaw gud, ayo-ayo bay,” dayong pabulhot, nagbilin og abog ug aso sa akong atubangan.

“Luoy gud intawon,” ako siyang gisyagitan, sure nga di ko niya madunggan. “Mas luoy ka kay nagsakyanan ka!”

Kon nakadungog pa to siya, ambot kaha kon makasabot siya sa akong buot pasabot.

Gitan-aw nako akong phone. “15,000 steps.”

Hmmm, unsay nindot nga showing ron?

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph