SUPERBALITA CEBU

Barrita: Instant divorce

Tipik sa Balaod

DUNAY instant noodles ug dunay instant coffee. Apan nakadungog na ba mo’g instant divorce? Mao kini ang gikahinaman niadtong mga magtiayon kansang kaminyuon nangabungkag na ug di na gyud sila magkauli pa.

Apan subo nga palandungon nga di sila makapahimus sa instant divorce, ang diborsiyo nga diha-diha dayon, kay alang da kini sa mga Muslim Filipinos kansang kaminyuon gigamhan ubos sa Code of Muslim Personal Laws of the Philippines.

Sumala pa sa Korte Suprema, ang usa ka lalakeng Muslim mahimong legal nga makadiborsiyo sa iyang asawang Muslim ubos sa gitawag nga instant divorce, ang paglitok sa pulong nga “talaq,” ang Arabic word sa divorce. Ang talaq gihimong illegal sa India. Gidili usab ang talaq sa Malaysia pinaagi sa text message.

Kini bisan pa kon human sila gikasal ubos sa Muslim rites, nagpakasal gihapon sila og sibil ubos sa Family Code of the Philippines. Matod sa Korte Suprema, ang unang kasal mao ang “validating rite” samtang ang ikaduha, “merely ceremonial.”

“The Muslim Code continues to govern the marital relations of Muslim spouses who first wed under Muslim law rites and decided to wed again under civil law rites,” nagkanayon ang desisyon sa Supreme Court First Division nga penetsahan og Hunyo 10.

Mao kini ang nahitabo. Ang magtiayon gikasal ubos sa Muslim rites didto sa General Santos City niadtong Hulyo 18, 1998. Nagpakasal na sab sila sa civil rites atubangan sa mayor sa lungsod sa Alabel sa Sarangani province niadtong Pebrero 4, 2004.

Nagkabuwag sila sa dihang ang bana nahimong pulis niadtong 2006 ug na-assign sa layo sa ilang pinuy-anan. Nag-away sila tungod sa financial support. Ang asawa ni-file og kasong grave misconduct, infidelity ug abandonment batok sa iyang bana sa women and children protection desk sa Philippine National Police, General Santos City.

Samtang ang bana ni-file og petisyon alang sa diborsiyo pinaagi sa talaq atubangan sa 8th Shariah Circuit Court sa Tacurong City, Sultan Kudarat province. Ang Shariah court nideklarar sa diborsiyo niadtong Marso 14, 2011.

Niapelar ang asawa atubangan sa 5th Shariah District Court sa Cotabato City ubos sa argumento nga ang ilang kaminyuon ubos sa civil law. Apan gidasonan sa district court ang gideklarar nga diborsiyo niadtong Nobyembre 2, 2011.

Nidangop ang asawa sa Korte Suprema. Apan gidasonan sa Korte Suprema ang nag-unang mga desisyon sa Shariah courts. Matod sa Labaw’ng Hukmanan, ang ilang kaminyuon ubos sa Muslim Code, busa legal ang pagdiborsiyo sa bana pinaagi sa talaq.

Matod sa Korte Suprema, ang unang kaminyuon sa magtiayon ubos sa Muslim Code mao angh “validating rite” samtang ang ikaduha nga civil rites atubangan sa usa ka mayor, “merely ceremonial,” seremonyas na lang. (edbarrita@gmail.com)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph