MOTAK-OP na karong adlawa ang kahigayonan nga gitagana ni Presidente Rodrigo Duterte sa pagpa-surrender niadtong dul-an sa 2,000 ka mga piniriso sa Bureau of Corrections (BuCor) nga gibuhi-an ubos sa Good Conduct Time Allowance (GCTA) law.
Sa ihap kagahapon, gikataho nga mosubra sa 1,000 pa lang ang mitahan na ug gipaabot nga madugangan pa kini karong adlawa.
Kadtong dili mo-surrender, ikonsiderar sa mga tinugyanan sa balaod nga mga fugitives o mga eskapo nga mahimong todason bisan unsa orasa sa higayon nga kini makit-an sa mga tinugyanan sa balaod.
Sa niaging adlaw, subling gipadayag ni Duterte nga iya gyung ipadayon ang plano nga patungan og tag P1 million ang matag ulo niadtong mga konbiktado apan nakapahimulos sa GCTA law nga dili mo-surrender – patay man o buhi.
“Basta ako sinabi ko, I will just set the timeline and then the P1 million prize is available to those who can capture them dead or alive, but maybe dead would be a better option,” nagkanayon ang presidente sa dihang gikahinabi sa mga tigbalita.
Ang pamahayag sa presidente naghatag karon og dakong hulga ngadto sa mga hingtungdan. Bisan gani kadtong mga legal nga nabuhi-an pinasubay sa saktong proseso nalakip na usab sa mga namilegro.
Dili halayo ang posibilidad nga mahisama unya usab kini sa kampanya sa mga tinugyanan sa balaod batok sa gidiling drugas nga mikalas og daghang kinabuhi tungod kay gisakyan sa mga abusadong pulis. Hinaot nga dili kini mahitabo, ilabi na kay adunay pabuya nga usa ka milyon ka pesos.
Sa mga GCTA beneficiaries nga wala pa mo-surrender, aduna pay hangtod karong alas dose sa tungang gabii sa paghukom.
Motahan nga magmalinawon o magpabilin nga magtago-tago?
Ana ra kaninyo ang desisyon.