Informal settlers sa Mahiga hinginlan na

HUGOT na ang desisyon ni Mandaue City Mayor Jonas Cortes sa pagpapahawa sa mga namuyo duol sa Mahiga creek.

Kini human iyang nakita atol sa clean up drive niadtong Sabado, Septiyembre 14, ang nag ung-ong nga mga basura hinungdan sa dali nga pagsuyla sa tubig matag baha.

Matod ni Cortes nga sobra na o nag overdue na ang pagbalay-balay sa mga lumolupyo sa dapit. Dugang niya nga gawas nga delikado, di puy-anan ang maong lugar.

Matod ni Cortes nga gihatagan na og financial assistance ang maong mga tawo ingon man gitanyagan og libre nga pagpauli sa probinsya aron di na mamuyo ug maglisod sa syudad.

Matod ni Cortes nga ang demolisyon sa ilegal nga namuyo pagtuman lang sa mando ni Presidente Rodrigo Duterte ingon man sa nagpadayong clearing operation sa Siyudad.

Sa nagkaduol na nga deadline sa mando sa Presidente, gibutyag sa enforcement unit head sa City Legal team Edwin Anthony Jumao-as nga 80% na nga kompleto ang paghawan sa mga pampublikong kadalanan.

Subsob na usab ang inventory sa mga opisyal aron masuta kon pila pa ka mga tindahan o kabalayan ang angay nga hawanon. Gihatagan pa hinuon og tulo ngadto sa lima ka adlaw nga lugway ang mga nanag-iya pagguba sa kaugalingong estruktura.