HUMAN nag-viral ang short film, gikuninitan pa ang libro niini, this time, sa big screen na sab mohatag og lingaw ang Jowable!
Likable. Lovable. Jowable. Apan way jowa o uyab! Kini ang subo nga gidangatan ni Elsa (Kim Molina), nga sa edad niyang 30 kapin, wa pa gyud tawon siya katilaw og usab.
Maanyag, sexy ug makalingaw, apan malas lang gyud pag-abot sa lovelife.
Di sama sa inahan niyang si Liberty (Kakai Bautista), nga kung makailis og jowa daw sama sa gailis og sanina, o sama sa iyang inlababo nga friend nga si Karissa (Cai Cortez).
Ang wish lamang niya, makabaton og uyab!
Luyo nga siya daghan og higala, apan mibati og ka-miserable si Elsa ug nagaselos sa matag couple nga iyang makita.
Sa wakas! Nahimamat niya ang lalaki nga na-atrak sab kaniya.
Kini na kaha ang tubag sa iyang gipangandoy?
Gipost sa Facebook page nga Vincentiments’ niadtong 2018, ang JOWABLE usa ka short film nga gisuwat ug giderehe ni Darryl Yap.
Daghang tawo ang nakarelate sa sentimiyento ni Elsa, mao nga mihataw gyud sa 1M ang views sa video human kini gipost.
Si Darryl Yap mihimo pa og laing duha ka short films alang sa JOWABLE series, una niya kini gihimong nobela.
Ang libro na-release niadtong Marso ning tuig ug sure hit sab.
Usa ka theatre writer ug director, si Darryl Yap nagsugod sa paggama og short films niadtong 2017.
Ang una niyang short film mao ang “Squatterina” nga gipakita sa North Luzon Film Festival, diin siya midaug sa Best Director award.
Ang “Squatterina” napili sab nga pambato sa Pinas sa Formosa Festival sa International Filmmaker Awards sa Taiwan, karong girekognisa nga usa sa 10 Best Short Films sa National Commission for Culture and the Arts | Cinema Rehiyo sa nakalabay nga 1st 10 years.
Si Darryl Yap sab ang nagmugna sa Facebook page Vincentiments, asa naka-post ang viral nga Jowable video.
Sa pikas bahin, si Kim Molina nagsugod sa iyang professional theatre debut niadtong 2013 dihang naapil siya sa cast sa Tarzan sa Disney.
Hangtud sa nagsunod-sunod na ang break nga nadawat niya.
Luyo sa akting, maayo sab mokanta si Kim, diin midaug siya as Best Performance by a Female Recording Artist sa 2017 Awit Awards sa iyang debut single “Naluluha Ako” under VIVA Records.
Si Kim sab ang mikanta sa official soundtrack sa Jowable nga mi-hit sab sa netizens.
Makita pa kaha ni Elsa ang iyang forever?
Ang Jowable magbukas sa mga sinehan, Septyembre 25. (RGV)