MGA drayber nga apektado sa modernization sa mga pampasaheroang mga sakyanan ug sa bus augmentation program sa dakbayan sa Davao nagmulo kay apektado kuno ang ilang panginabuhi sa pagpamasahero ug dako ang mawala sa ilang kitaon matag adlaw tungod sa pagpadagan sa mga bus aron mamasahero sa ilang mga rota.
Kabahin sa paglambo sa dakbayan sa Davao ang kalit nga pag daghan sa katawhan ug mga sakyanan sukad milingkod pagka pangulo sa nasud si President Rodrigo Duterte. Naghuot na sab ang mga sakyanan sa kadalanan ug taas na ang panahon sa pagbiyahe kon itandi sa milabay nga katuigan.
Panahon sa tingpauli sa mga estudyante ug mga trabahante atong makita ang panon sa katawhan nga nag-atang daplin sa kadalanan kay daw mikunhod ang gidaghanon sa mga namasahero nga sakyanan.
Mga drayber sa taxi mamili na sab sa ilang pasakyon nga mga pasahero ug moyam-id na sa mga mosakay nga moagi sa kadalanan diin ilang masugamak ang labihan ka trapik nga sitwasyon.
Ang mga drayber sa pampasaheroan nga mga sakyanan manundang sab pagbyahe kay alkansi kuno sa krudo tungod sa trapik, tungod niini nga sitwasyon, ang pagpadagan sa mga bus maoy sugyot sa City Transport and Traffic Management Office ug sa mga sakop sa konseho aron makapauli ang mga nangatanggong sa kadalanan.
Sa molo sa mga drayber, atong masabot nga ilang kaugalingon lang ang ilang ginatan-aw ug gikalimtan ang kahigwaos sa mga pasahero nga magdinaganay pagsugat sa magpadulong nga sakyanan diin ang uban antuson ang kahuot makapauli lang.
Kon bastante lang ang gidaghanon sa mga sakyanan nga moserbisyo sa katawhan dili na angay nga mopadagan pa og bus ang gobyerno apan asa man mo panahon nga kamo ilang gikinahanglan?
Ginatan-aw sa gobyerno unsaon pagserbisyo sa katawhan, pagsulbad sa mga problema ug pagpalambo sa dakbayan.
Ginaingon nga kauban sa paglambo ang ginagmay nga kahasol apan uban sa paningkamot, pagkugi, maka-adjust ra ta pag abot sa panahon.