USA ka lawom ug makuti nga imbestigasyon ang gihimo sa Homicide and Arson Section sa Sta. Ana Police Station human gipusil-patay ang duha ka mga lalaki.
Ang insidente nahitabo Martes sa hapon, Septiyembre 17, gawas sa sabongan sa Barangay Wilfredo Aquino, Agdao District, Davao City.
Subay sa spot report gikan sa Sta. Ana PNP gipang-ila ang mga biktima nga sila Jul Vincent del Carmen Manzanares, 26-anyos, negusyante, ug residente sa Guiho St., Nova Tierra Village, Lanang, ug usa ka Police Corporal Kronish Bandoquillo Alvaira, 30-anyos, residente sa Purok 2, Barangay Mainit, Compostela Valley Province.
Si Mazanares giila sa ilang kanhi kapuyo samtang si Police Corporal Alvaira, nailhan pinaagi sa iyang ID.
Una niini, nakurat na lang ang mga sabongero dihang nakadungog sila og daghang buto sa pusil diin sa pagsubay, nahay-ad ang duha ka mga biktima, pipila ka metros gikan sa sakyanan, kolor pula.
Sumala ni Police Major Michael Uyanguren, hepe sa Sta. Ana Police Station nga padayon ang ilang gihimong imbestigasyon sa hitabo.
Wala giwala sa kapulisan ang anggulo nga personal nga bangi tali sa mamumuno ug sa mga biktima ang nahitabo.
Patay nga lawas sa mga biktima gipangdala sa usa ka lokal nga punerarya ning siyudad. (Jeepy P. Compio)