SIGNIT ang usa ka brodkaster kinsa politiko usab sa Davao del Sur, uban sa laing upat pa, sa mga operatiba sa National Bureau of Investigation-South Eastern Mindanao Regional Office (NBI-Semro) atol sa entrapment operation Miyerkules, Septiyembre 18, sa Digos City, Davao del Sur tungod sa giingong pagkalambigit sa investment scheme.
Sa paghinabi Miyerkules uban ni NBI-Davao spokesperson Joel Ayop, iyang gikompirma ang pagkasikop ni Davao del Sur Board Member Arvin “Jun Blanco” Malaza human nasakpan sulod sa buhatan sa Kapa Ministry Foundation, karon Kapa Worldwide Inc. atol sa operasyon mga ala 1 sa hapon, uban sa iyang staff.
Ila na karong giimbestigahan ang pagkalambigit ni Malaza sa Kapa. Naa sila karon ubos sa kustodiya sa NBI-Semro.
Gibutyag ni Balite nga ang operasyon sa maong investment scheme ilegal nga nibalik karon lang semahana. Usa ka kasaligan nga impormante nihatag kanila og kasayuran ug ilang gilihok ang maong taho, nilusad og entrapment. Usa ka ahente ang nagpaka-aron-ingnon nga investor niadtong Martes ug ni-pay in og P30,000 ug giusban Miyerkules nga nikantidad og P10,000. Sa dihang nadawat na ang resibo, nagpaila gilayon sila nga mga awtoridad.
“Despite stern warning coming from no less than Chief Executive President Rodrigo Duterte addressed to all Kapa Ministry Foundation officers and personnel to cease and desist from further operating their activity found to be ‘Illegal’, Kappa Foundation Digos Branch under the management of duly elected Provincial Board Member ‘Jun Blanco’ continues to receive ‘pay-ins’ from investors of the said place, an act that is in complete defiance of the mandate of the Chief Executive and the SEC in gross violation of our penal laws,” matud ni Balite.
Sa iyang kabahin, gihimakak ni Malaza ang akusasyon ug nagkanayon nga way transaksiyon ang nahitabo. Ang iyang istasyon sa radyo ug ang buhatan sa Kapa nahimutang lang sa samang lugar.
Gisaway sa NBI-SEMRO si Malaza tungod sa pagpakatap og sayop nga impormasyon nga ang relihiyusong organisasyon nakakuha na og clearance alang sa ilang operasyon.
“Sad to note that Board member, Jun Blanco who claimed to be a Media practitioner had ironically used the freedom of expression in a manner to attain his own personal objective unbridled by using media to espouse and spread the wrong information to the public,” matud sa NBI sa sinuwat nga pamahayag.
Samtang giandam na ang kasong kriminal nga syndicated large-scale estafa ug paglapas sa SRC rules sa SEC batok kaniya ug sa iyang staff. (JCR)