DUNA nay duha ka persons of interest ang Mactan Police Station sa pagpusil patay sa usa ka magtutudlo sa miaging Sabado, Septiyembre 14, sa kaadlawon.
Ang biktima nga nailang si Benjamin Rosales gipusil gawas sa panimay niini ug moabot tulo ka mga tawo.
Matod ni Police Captain Narciso Abapo ang hepe sa Mactan Police Station nga ang duha sa tulo mao nay ilang nailhan base sa ilang pakisusi.
Ang uha giingong pulos nalambigit sa ilegal drug trade sa dakbayan sa Lapu-Lapu.
Giingog naglagot kini sa biktimang si Rosales sanglit aktibo si Rosales sa pag-tip sa kapulisan sa mga ilegal nga kalihukan sa ilang dapit nga miresulta usab sa malampusong operasyon sa kapulisan.
Ang gipangtumbok mga notado nga drug player sa dakbayan apan giingong magbalhin-balhin ug lugar.
“Daghan man gud ug accomplishment ang atong kapulisan through niya (biktima) sa atong kampanya sa war on drugs,” matod ni Abapo.
Padayon pa hinuong giila sa kapulisan ang usa ka kauban sa duha ka persons of interest sanglit wala usab kaayo ni kooperar sa ilang imbestigasyon ang adunay kasayuran sa pagpamusil ni Rosales gumikan sa kahadlok.
Gani ang iyaan sa biktima nga diha sa pagpamusil sa biktima wala pa usab mahinabi sa kapulisan.
Gitabangan na hinuon sila sa mga opisyales sa barangay sa pagkombinsir sa mga saksi sa pagtabang sa kapulisan.
Sa monitoring sa kapulisan anaa pa gihapon sa dakbayan ang ilang gitumbok nga mga persons of interest.
“In-ani gyud ni sila gyud tungod sa drugs, dili man nuon ni mga gun for hire ug menor de edad notado pero mangawagtang sad kalit,” matod ni Abapo sa Superbalita Cebu. (GCM)