GISUGDAN na sa City of Lapu-Lapu Office of Substance Abuse Prevention (C-Losap) sa pagpaubos niadtong 11 ka mga binilanggo nga nag-atubang og kasong illegal drugs sa ilang drug recovery treatment.
Ang maong 11 ka piniriso temporaryong nakagawas human nga mitugot ang korte nga sila makapahimulos sa plea-bargaining framework base usab sa memorandum nga gikan sa Korte Suprema.
Nasayran nga ang Korte Suprema nitugot niadtong drug offenders nga makapahimulos sa maong plea bargaining alang niadtong nadakpan nga nakuhaan og gamay nga ebidensiya sama sa shabu , marijuana o ubang matang sa illegal drugs apan gikinahanglan makapasar sa assessment sa Department of Health (DOH).
“The frameworkd allows the accused and the prosecutor to work out a mutually reasonable disposition of the c ase subject to court approval,” pasabot sa C-Losap executive director Garry Lao.
Niadto lang Septiyembre 12 nagsugod na ang maong mga binilanggo nga nagpangidaron gikan sa 30 ngadto na sa 40 anyos sa ilang out-patient rehabilitation treatment diha sa buhatan sa C-Losap.
Si Lyka Ugalino, pychometrician sa C-Losap nagkanayon nga ka-usa lang sa matag semana ang ilang pakigtagbo ngadto sa maong mga pasyente nga gihulagway niya nga wholelistic approach kay lakip ang mga sakop sa ilang pamilya sa maong rehabilitasyon.
“Mao man gyud ni sagad reaction sa family member niadtong user nga i-disown or kuwang og suporta,” matod pa ni Ugalino.
Ipa-ubos sab sa monitoring ang maong mga binilanggo inabagan sa barangay officials ug social worker kon unsay binuhatan niini atol sa ilang temporaryong kagawasan.
Mipasidaan si Ugalino niadtong dili motamod sa schedule o dili makompleto ang ilang treatment, kay ang buhatan sa C-Losap mopadala og manifestation letter ngadto sa korte nga nag-handle sa ilang kaso ug mandoan ang Police Station commander sa pagdakop og balik sa maong priniriso.
Gikatakda nga sa buwan sa Marso sunod tuig matapos ang unom ka buwan nga treatment ug laing unom ka buwang alang sa ilang after care.
Ang after care pinaagi sa suporta sa Lapu-Lapu City government ug barangay concern moabag kanila aron nga makapadayon sa ilang kinabuhing normal ilabi na niadtong buot motungha og vocational ingon man panarbaho. (FVQ)