SUPERBALITA CEBU

30 na nasikop sa trip cutting

NIABOT na sa 30 ka mga Public Utility Jeepney (PUJ) ang nasita sa siyudad sa Talisay ug kansang drayber ang magmulta tungod sa pag-trip cutting.

Ang mga PUJ ang adunay rota nga Barangay Basak, Cebu City padung unta sa siyudad sa Naga, ang gipang-isyuhan og citation sa mga sakop sa City of Talisay Traffic Operations Development Authority (CT-TODA).

Gisugdan ang operasyon niadto pang Sabado sa hapon, Setyembre 14, ug kanunay na nga himuon.

“Namugna ang operasyon tungod sa nadawat nga mga reklamo ni mayor Samsam(Gullas) gikan sa mga commuters nga gikan sa Minglanilla, Naga San Fernando ug Carcar nga dire sila i-drop sa Lawaan ug sa Tabunok (Talisay City), nya dili molahus sa ilang destinasyon sa Naga o Carcar,” pasabot ni Jonathan Tumulak, ang pangulo sa CT-TODA.

Gipasabot ni Tumulak nga ang ilang operasyon gawas nga mandu sa mayor, pinasikad usab sa ordinansa sa syudad, kalabot sa pagsunod sa rota diha sa transportasyon.

Diin ang mga driver nga makalapas niini ang mag-multa og P500.

Gawas nga gi-isyuhan sila og citation, gisakmit usab ang ilang mga signage nga gibutang sa windshield.

Pasabot ni Tumulak, kini aron dili na magamit pa diha sa ilang pagpamasahero.

Matud ni Tumulak nga sagad niining mga PUJ ang kutob lang sa Talisay City o sa lungsod sa Minglanilla.

Mahitabo kini kasagaran sa alas 5 sa hapon hangtud na sa gabii.

Sukad niadtong Sabado hangtud sa Lunes sa gabii nikabat na og 30 ka mga PUJ ‘s ang nadakpan.

Dugang ni Tumulak nga dali alang kanila ang pagsuta sa usa ka PUJ nga nag-trip cutting, human nga ang road signage ug body signage sakyanan kay alang sa rota unta pa-Naga, apan ang gibutang nga signage sa windshield sa PUJ ang kutob lang sa Talisay o Minglanilla.

Nakig-alayon na usab sila sa Land Transportation Franchising and Regulatory Board (LTFRB-7) kinsa nakadawat usab og susama nga reklamo gikan sa mga pasahero.

Nasayran nga kon ang LTFRB na ang makasita, mamahimong makamulta ang driver og P100,000 o kapin pa ug mahimo pa nga ma-impound ang sakyanan, kay masusama naman kini sa colurom nga sakyanan, kon mang-trip cutting.

Asoy sa mga nasikop nga driver nga nang-trip cutting, nga nanghiyawat sila sa kahigayunan nga daghan ang mga pasahero sa maong mga orasa. (FMD)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph