GITAMBAGAN ang mga tawo nga adunay asthma ug uban pang cardiovascular diseases nga mag-mask sa panahon nga mogawas sa balay subay na usab sa haze nga nasinati sa Metro Cebu.
Gikompirmar na sa Environmental Management Bureau (EMB) 7 nga nakasinati karon og nag-anago o hazy nga oanahon ang Sugbo.
Tungod kini sa forest fire sa Sumatra, Indonesia nga ang aso nadala sa hanging habagat.
“Haze caused by forest fires can cause air pollution, which can bring about health risks for respiratory tract infections and cardiac ailments,”tipik sa public advisory sa EMB 7.
Matod ni Engr. Cindylyn Pepito-Ochea, chief sa Environmental Education and Information Unit sa EMB 7, nga alas 8:50 sa buntag, Miyerkules, Septiyembre 18, nilapas na sa safe guideline value ang particulate matter 2.5.
Anaa na kini sa 56 micrograms per normal cubic meter.
Ang normal anaa lang sa 50 micrograms per normal cubic meter.
Tungod sa kapino sa PM 2.5 nga abog, diin anaa lang sa 2.5 micrometers sa dayametro ang gidak-on.
Kon itandi kini sa kapino niini, 3% lang sa gidak-on sa buhok ang gidak-on niini.
Tungod niini, kuyaw kini nga mahanggap sa tawo.
“Since they are so small and light, PM 2.5 tend to stay longer in the air than heavier particles. This increases the chances of humans and animals inhaling them into the bodies and might bypass the nose and throat and penetrate deep into the lungs. Some may even enter the circulatory system,” matod sa advisory.
Subay niini, nitambag na ang EMB 7 nga mag-amping ang tanan hilabi na ang mga residente sa Metro Cebu.
Mosul-ob kini og personal protective equipment (PPEs) susama sa dust mask ug eye goggles aron maprotektahan ang kaugalingon sa air pollutants.
Kinahanglan nga N95 or surgical mask ang gamiton.
Tambag sa EMB 7 nga kon way buhaton sa gawas, magpabilin nalang kini sulod sa balay o edipisyo.
“Do not jog nor run outside as the body ingests more pollutants when active,” dugang sa advisory.
Base sa Department of Health (DOH) Advisory, mokunsulta dayon sa doktor kon naglisod og ginhawa, magsakit ang dughan, magluha ang mga mata, ug mo-irritate ang ilong ug baba.
“We still have to determine the types of gasses of the haze. Yes, it has risks to health especially for the elderly and the neonates and those with allergies. Better to avoid exposure by staying indoors as much as possible,” matod ni DOH 7 Regional director Dr. Jaime Bernadas.
Samtang si Amaryllis Villarmia, information officer sa Department of Education 7 (DepEd-7), sa mga tunghaan pampubliko sa Metro Cebu, wa pay pagsuspenso sa klase kay ang gideklarar karon sa EMB 7 mao lang ang paghimo og mga panagana.
Matod ni Amaryllis nga nipahibawo na sila sa mga tunghaan nga managana, magsul-ob og protective nga gamit, sama sa taptap sa abog.
Ang DepEd mokanselar lang sa mga klase kon dunay mando sa Central Office o sa mga ahensya sa lokal nga kagamhanan.
Hapit na kada tuig nga ang sunog sa kalasangan sa Indonesia nahimo nang problema sa Pilipinas ug ubang mga nasod sama sa Singapore ug Malaysia. (HBL, dugang taho ni RSR)