SUPERBALITA CEBU

Nag-upload sa video sa dalaga ipangkiha

NIDANGOP na sa Police Regional Office 7 (PRO) 7 ang dalagita nga gi-videohan sulod sa usa ka pribadong sakyanan nga gihuboan sa iyang senina ug gipakita ang pribadong parte sa lawas.

Ang video, bisan gitangtang, na-download pa ug na-share.

Uban sa 16-anyos nga dalaga ang iyang maguwang babaye nga nisaysay kon unsa ang nahitabo niadtong panahon nga sakay siya sa sakyanan sa iyang mga kaila.

Nag-inom

Matod sa maguwang nga niadtong tungora nakainom ang iyang manghod ug way kasayuran kon unsay gihimo sa mga kauban niini sa sakyanan.

Iyang gitug-an nga katong makita sa video pulos ra nila kaila ug nasagmuyo siya sa gihimo niini sa iyang manghod.

“Kaila ra to niya tanan nga naa sa video, Sir. Katong usa ka lalake kauban sila sa school nya katong uban, mga barkada ra sad,” matod sa igsuon.

Ang upat ka mga suspek nagpangidaron usab og 15 ug 16 anyos.

Ikiha

Matod ni Police Brigadier General Debold Sinas, hepe sa Police Regional Office 7, nga nailhan na nila kinsa ang upat ka mga lalake nga naa sa video.

Aduna na usab silay 10 ka mga tawo ang nailhan na sa kapulisan nga ni-share sa video sa social media nga ilang ilakip sa mapasakaan og kaso sa mosunod nga mga adlaw.

“Na picturan man na screen shot ang kinsa tong nagpadala. So, among pang filan tong tanan. Sa karon, daghan na screen shot ang pulis ug ang pamilya nga nag post. Tanan didto nga na identify nga nag post sa ilang FB sa ilang account filan namo tog kaso,” matod ni Sinas.

Tungod niini, nibahad si Sinas nga ilang pangitaon pa kadtong mga tawo nga mi share pa sa social media ug ilang ikiha.

Dugang ni General Sinas nga naa pa sa trauma ang biktima nga gipaubos sa imbestigasyon sa Women and Children Protection Center 7 tungod kay nakadawat na kinig hulga gikan sa usa sa mga nag upload sa video.

Gipasaligan niya ang dalaga nga di mahadlok sa hulga sa mga suspek tungod kay mosamot pa ang kaso nga ilang atubangon kon ipadayon ang pagpanghulga.

Awhag niya sa mga ginikanan sa upat ka mga suspek nga i-surrender kini sa kapulisan kay kon padayon nila kining itago, modako pa ang problema, mahimo silang wanted.

Gitahasan ni Sinas ang hepe sa Cebu City Police Office Police Colonel Gemma Vinluan nga maoy mohimo sa imbestigasyon ug sa pagpasakag kaso batok sa mga suspek.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph