BAG-O na ang hepe sa Criminal Investigation and Detection Group 7 (CIDG) 7 sugod niadtong miaging Huwebes, Septiyembre 12, human parelibuhi sa katungdanan si Police Colonel Lito Patay.
Ang paghulip kang Patay may kalabutan sa ilang pag-raid sa usa ka Chinese company sa Barangay Mactan, Dakbayan sa Lapu-Lapu niadtong Septiyembre 7, 2019.
Ang mohulip kaniya mao si Police Colonel Rommel Ochave gikan sa CIDG Luzon nga sakop sa Philippine National Police Academy class of 1996.
Si Patay giingong maoy mopuli kang Ochave sa CIDG Luzon.
Matod ni Police Regional Office Director Brigadier General Debold Sinas nga ang usa sa hinungdan nga gihulipan si Patay mao ang kontroberysal nga pagronda nila sa giingong online nga pasugalan sa Barangay Mactan.
Sa ronda, dul-an sa 200 ka mga Chinese national ang nangadakpan human wa makapakitag dokumento ang kompaniya nga aduna silay permit gikan sa Philippine Amusement Gaming Corporation (Pagcor). Nakapakita ra ang kompaniya.
Apan ang 181 ka mga Chinese national nga nadakpan gipabuhian sa Lapu-Lapu City Prosecutors Office tungod sa kakuwang sa ebidensya.
Si Lapu-Lapu City Prosecutor Ruso Zaragoza wa mouyon sa findings nila ni Assistant Prosecutors Sheilamar Saliganan-Abadia ug Antonio Aseniero nga dunay probable cause batok sa Chinese nationals atol sa inquest proceedings.
Nihukom si Zaragoza sa pag-terminate sa inquest proceedings sa kasong illegal gambling ug nihimo sa proceedings ngadto sa regular preliminary investigation.
Gimandoan ang CIDG 7 sa pagduso og dugang mga ebidensya, labina sa sulod sa computers ug laptops.
“That was the reason for his relief. Di na ko mamakak para dili na mo maghuna-huna. That was the reason behind his relief. That is their choice, not mine. Kasi dili na ko moestorya he was relieved,” matod ni Sinas. (AYB)