NAG-INOM ang tulo ka mga estambay sa atubangan sa tindahan ni Manang Elyang. Sila si Estong, Isko ug Butoy pulos way mga permanenting trabaho. Katalirungan sila sa edad nga lapas og diyutay sa bayinte. Makasapi lang sila kon may ipamalihog ang ilang mga silingan, sama sa paghakot og tubig, pagkarga og mga butang o bisan unsa na lang nga ipabuhat kanila. Sa mga higayon nga way mosugo kanila ug way makuot nga sensiyo sa ilang bulsa, ‘manghingi’ sila sa mga tawo ug mga estudyante nga mahiagi sa tindahan aron ipalit og lapad nga Tanday rum nga ilang tangwayon samtang nagpalabwanay og hambog.
Karong hapuna, si Butoy maoy mibangka kay gisuwerte ang iyang diyes pesos nga suhol ni Nang Ester kaniya sa pagpalit og duha ka konteyner sa ‘spring water’ sa ‘refilling station.’ Gipalit kini niya og numero sa STL, numero 739, plaka sa awto ni Atty. Rosal nga iyang naagian sa pagpalit niyag tubig. Straight iyang nadag-an, dili rumble nga sagad maoy iyang pustaan. Nakadaog siyag P2,500.
“Beer atong tagayon ron, mga abay!” matod ni Butoy kanilang Estong ug Isko.
“Ang sumsuman, Bay Butoy?” ni Estong. “Puol na kaayo nga isumsom ang atong mga dila, uy!”
“No problem. Magpaabli tag tulo ka corned beef ni Manang Elyang!” ni Butoy nga miyango kang Manang Elyang.
Samtang sila nag-inom nagpadayon sab ang ilang hinambugay.
“Hibawo ba mo, Bay, nga ang among iring maayo mosayaw og limbo rock?” ni Estong.
“Yatis da, Bay! Pero lupig na sa among iro!” ni Isko.
“Ngano man, Bay?” ni Butoy.
“Ang among iro kamao mangumpra sa Carbon!” ni Isko.
“Ah! Mouli na lang ko, uy!” ni Butoy nga mi-aksyon pagtindog.
“Mouli ka? Upat pa gani ka botelya imong nainom!” ni Estong.
May gikuot si Butoy sa bulsa sa iyang purol nga maong. “Dia, o. Mi-teks ang akong hiniktan nga nakabuhi ang among butakal!”
Nahikatawa si Manang Elyang ug ang duha ka babaye nga may gipalit sa tindahan.
Unya dihay nahunahunaan nga binuang si Butoy. Gusto niya nga lingawon ang duha ka higala.
“Mag-paregla ko, Bay!” ni Butoy nga milantaw sa unahan. May nakita siyang batan-ong babaye nga nagpaingon sa ilang nahimutangan kay anhi man gyud kini moagi. Nagsul-ob ang babaye sa uniporme niya sa eskuylahan. May ‘backpack’ sa iyang likod.
“May kulatahon ka?” ni Estong.
“Wa. May nagpaingon nganhi nga gwapa. Akong hagkan,” ni Butoy.
“Ah! Isog ka man lang kon mahubog!” ni Isko.
Paghitungod sa batan-ong babaye sa ilang nahimutangan gibabagan dayon kini ni Butoy.
“Naunsa ka?” Misiga ang mga mata sa babaye nga nakurat.
“Gusto ko mohalok nimo,” ni Butoy nga mikupot dayon sa bukton sa dalagang estudyante.
Apan abtik ang dalaga nga mitursi sa bukton ni Butoy dungan ang pagtuyok. Nahagsa si Butoy sa yuta. Gihubo sa dalaga ang iyang backpack.
“Bangon, Bay Butoy! Ayg palupig og babaye!” singgit ni Isko.
Mibangon si Butoy. Apan wa pa gani siya katarong og tindog midasdas ang batan-ong babaye ug usa ka kusog nga ‘round-house kick’ ang nakaigo sa nawong ni Butoy. Nahagba si Butoy sa yuta nga nagping-it sa kasakit.
“Kamo, laban mo niya?” sukna sa batan-ong babaye nilang Estong ug Isko. Nanukad kini andam pagdepensa sa iyang kaugalingon.
“Di, Miss, uy! Siya ra may namaregla nimo!” nagdungan pagtubag ang duha.
Dihang nakalakaw na ang batan-ong babaye may gisulti si Manang Elyang, “Wa diay mo kaila ni Teresa? Champion siya sa tae-kwon-do sa CVAA dinhi sa Sugbo!”
(KATAPUSAN)