Kyaw-Kyaw: Ang nakanindot sa Cebu Press Freedom Week

USA ko sa mga taga Cebu media nga maghinamhinam sa pag-abot sa ikatulong semana sa Septyembre kada tuig diin saulogon ang Press Freedom Week.

Ang nakanindot god niini mao nga ang mga sakop sa media mopadaplin una sa kompetisyon sa tagsatagsa ka mga outlet aron ipatigbabaw ang panaghigalaay, panaghiusa ug pagtambayayong.

Nakita kini sa mga kalihukan sa tibuok semana sukad sa pagpili sa Mr. & Ms. Press Freedom 2019 (John Kendrick Ceciban ug Preciosa Bacalso sa The Freeman) niadtong Sept. 14 sa Cebu Business Hotel, sa fellowship opening pagka sunod adlaw sa Capitol social hall ug sa uban pang kalihukan.

Himoon ang closing fellowship ugma adto sa Oakridge Business Park. Mabuhi ang Cebu media!

•••

Bisan di pa ko gusto nga maminaw og awit sa Pasko, wa koy nahims kay didto man kini gipatugtog sa Ceres bus niadtong Lunes samtang nagbyahe ko padulong sa Oslob.

Di ang ‘Christmas in Our Hearts’ ni Jose Mari Chan ang una nakong nabati kon di ang ‘Pasko sa Usa Ka Binilanggo’ nga gisundan sa daghan pang kanta sa Pasko nga Binisaya.

Didto na sa unahan ang ‘A Perfect Christmas’ ni JMC. Sa Dis. 1 na gyud ko magpatugtog ug unahon nako ang mga kanta sa Alvin & The Chipmunks kay makapahiyom ko sa mga tradisyonal nga Christmas songs nga mga gagmayng tingog ang nagkanta.

•••

Ang ‘The Panti Sisters’ ray akong natan-aw sa mga apil sa Pista ng Pelikulang Pilipino. Angayan kaayo sila si Paolo Ballesteros, Martin del Rosario ug Christian Bables nga gihagit sa ilang papa (John Arcilla) nga makadawat lang sa ilang inheritance (P300 milyon) kon makapaanak sila.

Gawas sa alegre nga mga binayot nga komedya, may social commentary ang pelikula bahin sa LGBT, sa katungdanan sa gobyerno ug sa publiko mismo.

•••

Samtang nagkaguliyang ang mga netizens ug ang madlang pipol, nagpakahilom ra ko bahin sa kontrobersiya sa resbakan sa Tawag ng Tanghalan sa Showtime.

Unsaon nga ning nilabayng pila ka adlaw, human sa KapareWho o sa Mr. Q&A, mopirokpirok na man ang akong mga mata sa kaduka.

Mao nga bisan gusto unta kong mosuporta sa mga Bisayang mag-aawit sama ni higalang Girlie Lapinid-Laspiñas, di na ko kahimo kay nindot na kaayo akong paghinanok. Anà!

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph