MATAPUS na karong katapusan sa buwan ang tagal nga gihatag sa Department of Interior and Local Government (DILG) sa tanang mga local government unit (LGU) aron paglimpiyo sa kadalanan sa ilang tagsa-tagsa ka mga dapit. Ang paglimpiyo dili lamang ang pagpanilhig ug pagpanghipus sa mga basura apan sa pagbungkag sa mga estraktura nga gitukod sa dapit sa kadalanan nga mibabag na sa mga sakyanan ug sa mga agi-anan sa tawo. Kining deadline sa DILG pinasubay usab sa kasugo-an ni Presidente Rodrigo Duterte nga ibalik ngadto sa katawhan ang kadalanan. Apan natuman na ba gayud sa mga LGU ang maong kasugo-an? Sa pagka-karon anaa pa kitay makita nga mga tindahan ug mga estraktura nga maka-ali na sa trapiko ug ang uban mibabag na sa mga pedestrian lane. Anaa pa gayuy mga dalan dinhi sa dakbayan sa Sugbo nga permanente nang nasira tungod kay gitukoran na kini og mga building ug tindahan. Kining kasugo-an gihimo sa Presidente aron nga mahapsay ug luwas ang pagdagan sa trapiko ug sa mga tawo. Ang silot sa dili makatuman niini human sa deadline mao ang pagka- saba, suspensiĆ³n o pagka-tangtang sa pwesto sa mga mayor.
Kalabut niini gisugyot ni kanhi Carcar councilor Boy Sato nga i-apil na lang sa mga mayor ang paghimong luwas sa kadalanan. Iyang gitumbok ang sitwasyon sa South Road Properties (SRP) diin ang centro sa kadalanan niini anaay ali nga konkreto nga daghan nang nadisgrasya kay dili man makita labi na panahon sa kagabhi-on ug ting-uwan. Unta mapintalan kini og reflectorized paint nga mosiga kon ma-igo sa hayag sa suga sa sakyanan.
Samtang nagpaabut pa kita nga mapatuman ang gisaad ni Mayor Edgardo Labella sa pag-ilis og bag-o ug modernong traffic lights kinahanglang i-adjust una pag-usab ang timing sa computer sa mga traffic lights aron dili kini magpataka lang og pid-ok.
Reklamo
Gi-aksiyonan na sa Securities and Exchange Commission (SEC) ang daghang reklamo batok sa mga Financing Companies (FC) ug Lending Companies (LC) nga manghasi sa ilang mga utangan pinaagi sa pagamit og mga abusado, way batasan ug dili maki-angayon nga mga pulong aron sa pagpaningil sa may mga utang kanila. Kining mga FC ug LC mogamit og third-party service provider (TPSP) aron makapanghunaw sila sa paghasi sa ilang mga kliyente.
Ang SEC mi-isyu og Memorandum Circular 18 series of 2019 nga nagdili na sa paghasi sa mga may utang kanila. Ang mga LC nga mosupak sa maong Memorandum Circular multahan og P25,000 sa first offense ug P50,000 sa second offense. Ang mga FC multahan og P50,000 sa first offense ug P100,000 sa second offense. Sa third offense, sigun sa discretion sa SEC mumolta sa duha ka mga kompaniya og doble sa ikaduha nilang sala basta dili lang molapas sa usa ka milyon ka pisos. Mahimo usab silang suspensuhon o kaha tantangan gayud ang mga malapason sa ilang Certificate of Authority to Operate sa ilang negosyo. Atong panid-an og mahunong na ba kining abuso nga naandang himuon sa mga kolektor sa maong mga kompaniya.
(msr1144@gmail.com)