NANAWAGAN sa gobyerno ang mokabat sa 5,000 ka mga Angkas drivers sa Cebu nga himuong legal ang ilang operasyon kay niumento na ang ilang serbisyo, labi na sa kaluwas ug sa proteksyon sa ilang mga pasahero.
Ang mga sakop sa Angkas, usa ka app-based motorcycle taxi service nga gilusad niadtong 2016, niingon nga duna na silay accident insurance coverage hangtod sa P450,000 sa ilang mga bikers ug pasahero ug training sa anti-sexual harassment.
Si Angeline Tham, founder ug chief executive officer sa Angkas, niingon nga tungod sa training ug bag-ong sistema, nakab-ot nila ang “99.997” porsento nga safety record sa ilang operasyon.
•••
Matod pa ni Tham, ang statistics sa gobyerno nagpakita nga 53 porsento sa mga aksidente sa kadalanan naglambigit og mga motorsiklo, hinungdan nga nagdiki-diki ug nagpanuko ang gobyerno sa paghimong legal sa mga motorcycle taxi sama sa Angkas.
Apan matod pa niya, ang Angkas adunay 99.997 porsento nga safety record. Nakab-ot kini pinaagi sa libre nga training sa ilang mga drivers nga naglakip sa basic street rules, traffic lights, road awareness ug uban pa.
Apan kon himuong legal ang operasyon sa Angkas, unsay mahitabo sa libo ka libong mga drayber sa mga habal-habal? Kon mahinumdom kita, sa dihang gisuspenso sa gobyerno ang Angkas, napagan sab ang mga habal-habal.
•••
Nag-ung-ong karon sa House of Representatives ang House Bill 6909 nga mag-amendar sa Section 458 (1) (vi) sa Republic Act (RA) 7160, ang Local Government Code, ug sa Section 7 (c) sa RA 4136, ang Land Transportation Code.
Tumong niini nga himuong legal ang operasyon sa mga habal-habal, lakip na ang app-based nga Angkas. Apan way tigpamaba ang mga drayber sa habal-habal, gawas lang sa mga politiko nga misapupo kanila sa naghinangat pa ang miaging eleksyon.
Nagpadayon pa ang unom ka buwan nga pilot-test sa Angkas sa Metro Manila ug Metro Cebu nga giaprobahan ni Transportation Secretary Arthur Tugade niadtong Mayo human sa pagsuspenso sa Angkas ug mga habal-habal. Di kaha mabiyaan ang mga habal-habal niini?