ANG mga baboy karon morag mga ‘terorista’. Dili pasudlon sa mga pantalan kon walay mga dokumento. Ang mga karne ug processed meat kompiskahon sa airport pa lang gumikan sa kabalaka nga natakbuyan kini sa African Swine Fever (ASF).
Wala kaha mag-overacting ang atong mga lokal nga opisyal kabahin aning isyo sa ASF ug wala kaha magkayagaw ang atong mga ahensiya sa gobiyerno sa paghawid ning maong isyo? Wala kaha mag-atras-abante ang ilang mga pamahayag nga maoy naka-ingon nganong nag-panic o naratol ang publiko?
Nganong nakapadayag ako ning maong mga pangutana? Gumikan kay wala may klaro ang pamahayag sa atong mga opisyal sa Department of Agriculture (DA) nga maoy nag-unang ahensiya nga naghawid ning maong isyo. Niadtong miaging semana, gibutyag sa mga DA officials nga nakasulod na dinhi aa nasud ang ASF labi pa sa mga probensiya sa Rizal ug Bulacan. Apan pagka-ugma mi-ingon sila nga na-contained o napugngan ang pagkatap niini?
Sa dihang gipangutana sa mga tigbalita gi-unsa pagpugong, wala sila makahatag og tino ug klarong tubag. Unya ang atong DA regional director dinhi sa region 7, Salvador Diputado, nagkanayon nga walay kaso sa ASF dinhi sa Central Visayas apan ang mga baboy nga gikan sa Negros Oriental gipabalik dayon sa ilang destinasyon.
Kay ngano man, nasuta na ba dayon nga ang maong mga baboy natakbuyan og ASF? Dili man nato makita sa atong mga yanong pagtan-aw nga ang usa ka baboy natakbuyan sa ASF. Ipaagi pa kini sa mga laboratory diagnosis. Wala kaha mag-overacting ang atong mga opisyal sa pagdili sa mga buhing baboy ug mga karne nga makasulod dinhi sa Sugbo?
Diha man gani mi-text nako nga adunay taga Cebu nga namista didto sa Bohol nga nag-bring house og humba ug lechon paksiw, gikompiskar sa guwardiya sa pantalan kay gidili lagi ang pagdala og karne kay maoy mando sa ilang labaw gumikan kay maoy mando sa gobernador. Aw, ang guwardiya maoy mikaon sa humba og paksiw. Unya maayo kaha na?
(bobbygnalzaro@gmail.com)