SUPERBALITA CEBU

Super Suroy: Dahilayan: Adventure diha sa kinaiyahan

ADVENTURE seeker ka ba? Hilig ba nimo nga malingaw nga inubanan sa kulbahinam nga experience?



Kon naa ka ani nga qualities, tana atong suroyon ang Dahilayan Adventure Park sa Province of Bukidnon, Northern Mindanao.

Bugnaw nga hangin ug relaxing paminawon nga mga huni sa mga langgam ang imong madunggan ug sa pagsulod pa lang nimo sa maong adventure park.

Perfect sab ang Dahilayan kon nangita kag pahulayan sama niining ilang Pine Grove Mountain Lodge nga ingon sa anaa ka sa tunga-tunga sa lasang kay gipalibutan og daghang punoan sa mga kahoy.

Room Rates

Affordable alang niadtong nagtinguha nga mo-avail sa ilang rooms nga gikan sa P2,000 ngadto sa P6,000, depende sa inyong mapilian nga accommodation.

Kon relaxation ug unwinding ang imong gipangita, dili ka mabalaka kay adunay coffee shop sa tuong bahin sa park nga pwede kang mag-stand by samtang nagpalabay sa oras.

Apan, kon kinaham gyud nimo ang extreme adventures, di sad gyud magpauwahi ang park nga mokuhit nimo aron pagpasuway sa mga gi-andam nga breath taking rides.

Extreme Adventures

Atong sugdan sa Dual Zipline ang giilang labing taas nga dual zipline sa Asya.

Dinhing dapita mahatagan og katumanan ang imong damgo nga mamahimong superhero sama ni Superman o Darna kay mora kag molupad gamit ang zipline nga adunay gitas-on nga 840 meters ang imong labangon ug gitas-on nga 90 feet gikan sa ubos.

Sa mosuway sa 840-meter zipline adunay bayad nga P500 samtang sa 320-meter plus ug 150-meter zipline mokabat ngadto sa P250.

Alang sa mga adventurer, ang zipzone maoy talagsaon nga destinasyon sa park nga pwedeng masuwayan at all ages.

Ikaduha ang Drop Zone kun giila sab nga hulog ka ng langit. So, kadtong mga gibate og ka-isog dia na ang bagay kanimo.

Birahon ka pataas hangtod maabot sa 120 feet ug yanong buhian imong harness aron ka mahulog ug i-swing babaw sa man-made lake.

Rate sa maong drop zone mokabat ngadto sa P500 – P700 per head.

Sa mas isog-isog diay Sky Tower Base Jump giila nga labing taas nga base jump tower sa Pilipinas

Doblehon ang imong kakuyaw dinhi ug normal lang nimo nga masinati ang pagkurog sa imong mga tuhod ug paspas nga pinitik sa imong kasing-kasing.

Kini tungod kay molayat ka sa sky tower nga adunay gitas-on nga 65-feet gikan sa babaw, apan ayaw og kabalaka kay luwas ra ang aktibidad tungod sa harness nga naghupot sa luyong bahin sa imong lawas. Kon isog ka, suwayi na sa tag – P400.

Kon gusto kag ilamba, tuyok dayon untol-untol suwayi ang Python Roller Zipride.

Lahi kini sa naandan nga zipride kay lingkod imong position og moabot sa 500 meters ang ang gitas-on sa rota nga imong subayon.

Apan malamba, mauntol ug matuyok sab ang imong masinati sa niini nga ride.

Pero ayaw og kabalaka kay ang imong kakuyaw malabwan na sa kalipay tungod sa maanindot nga view nga imong makita hilabi na nga gitung-an ka og mga tag-as nga mga pine trees sa kantidad nga P300.

For kids na sab ta diin haom kaayo ang Boot Camp Kids ang pinakadako nga Inflatable course sa nasud.

Busa di ma-out of place ang mga tsikiting ilabi na niadtong pamilyado nga magdala og mga bata atol sa pagduaw sa adventure park tungod kay adunay alang kanila.

Sulod sa maong boot camp ang mga higanteng inflatable obstacle course nga adunay area diin pwede ang mga beginners.

Highly recommended alang sa mga bata ang magsul-ob og leggings ug long sleeves aron paglikay sa minor friction burns.

Apan, gidili nga suoton ang mga senina ug karsones nga adunay zipper, ariyos, relo, ug singsing aron di mabuslot ang inflatables.

Kwatro anyos ang minimum age nga pwede makaduwa sulod sa boot camp nga nagkantidad kini ngadto sa P150 matag bata.

Pipila lang ang Zipline, Drop Zone, Sky Tower Base Jump, Boot Camp, ug Python Roller Zipride sa mga extreme activities nga pwedeng masuwayan sa adventure park.

Sigurado ra sab nga luwas ang mga gusto mosuway sa mga rides tungod kay moderno ang pasilidad nga gigamit niini.

Unsa pa may imong gihuwat? Tara na! Atong suwayan ang Dahilayan.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph