BETERANONG promoter sa America nga si Bob Arum mitambag ni Manny Pacquiao nga angay na kining moretiro kon dili man gani kini makakuha og dakong tanyag nga makig-rematch ni Floyd Mayweather Jr.
Sa interview sa World Boxing News website, si Arum, kinsa maoy nahimong promoter ni Pacquiao sulod sa hataas nga katuigan, mipadayag nga gusto siyang makakita sa iyang kanhi batos nga moretiro na niining panahona.
Sa pagkakaron, si Pacquiao kinsa midaog sa ilang grabing binukbokay ni Keith Thurman aron langkataon ang WBA welterweight title niadtong Hulyo, wala pay gikatakda kon kanus-a ang sunod away niini.
Apan nagtuo si Arum nga ang pagpadayon og away ni Pacquiao, kinsa mag-41 anyos na karong Disyembre, maghatag lang og risko sa iyang panglawas kon dugayon pa niya ang pag-undang sa pamoksing.
“Pacquiao, I promoted him for many, many years,” saysay ni Arum sa World Boxing News.
“He’s an exceptionally good human being, really a fine guy, extraordinarily charitable and a delight.”
“But he’s (almost) 41-years-old. And if you’re 41 you can’t take punishment. You can’t take blows like he did in the Thurman fight. Sure, he won that fight – but he took a lot of punishment. That punishment is going to have a serious effect on how he lives the rest of is life.”
Si Arum, kinsa sa sayo pa mipadayag sa iyang kahadlok nga tingali og maapektohan ang pangutok sa wala pa ang away ni Thurman, miingon nga angay sab hinuon ikonsiderar ni Pacquiao ang pagpakig-rematch ni Mayweather.
Sa ilang away niadtong 2015 sa promotion nga gitawag og “Fight of the Century’” midaog si Mayweather pinaagi sa unanimous decision.
Gibutyag ni Pacquiao nga ang pagka-injure sa iyang abaga maoy hinungdan sa iyang pagkapukan.
“If he gets Mayweather, do that fight and retire. If he doesn’t get Mayweather he should retire. It’s not worth it for him to continue boxing,” panapos ni Arum. (JBM)