SUGBOANONG Asian Games gold medalist Margielyn Didal mosugod na sa iyang kampanya sa World Skates / Street League Skateboarding World Championships karong adlawa didto sa Sao Paulo, Brazil.
Ang 20-anyos nga Didal, ang lumad nga taga Lahug, dakbayan sa Sugbo nahimong sentro sa atraksiyon sa nasod human kini makalangkat og gold medal sa niaging Asiad sa Palembang, Indonesia sa niagin tuig.
Duha ka katuyo-an ang anaa sa alimpatakan ni Didal ning iyang pagsalmot sa maong kompetisyon.
Kini mao ang pagkuha og qualifying points alang sa Tokyo Olympics sa sunod tuig ug sa samang higayon iya usab kining giisip nga pagpahanas alang sa 30th Southeast Asian Games sa Tagaytay City.
Si Didal maoy milangkat sa ikalimang puwesto ning susamang kompetisyon nga gipahigayon didto sa Los Angeles, ug malaumon nga mapausbaw pa ang iyang performance ning higayona.
Target niya nga maka medal aron hingpit nga makakuha og igong qualifying points alang sa Olympics.
Sa World Olympic Skateboarding rankings, si Didal nahagsa gikan sa ika-10 nga puwesto ngadto sa ika-13 nga luna human wala kini makasalmot sa Skateboarding Open sa qingfeng, China sa sayong bahin ning buwana.
Ang Skateboarding and Roller Sports Association of the Philippines, Inc. (SRAPI) ang moparada usab sa Fil-German nga si Daniel Ledermann, ang national men’s champion, kinsa nagtinguha usab og luna alang sa Tokyo Olympics. (JBM)