TINGUHA karon ni Olympic silver medalist Hidilyn Diaz nga matupngan o malabwan ang iyang bronze medal finish sa niaging edisyon sa International Weightlifting Federation World Championships sa 55-kilogram karong adlawa sa Pattaya, Thailand.
Kon kahinumdoman, ang 28 anyos nga Diaz, nakahulbot og bronze medal sa duha ka editions sa maong biennial competition sa Houston niadtong 2015 ug sa Anaheim sa 2017 ug dako ang iyang pagtuo nga iya pa kining mapalabwan ning higayona.
Samtang ang iyang ig-agaw nga si Mary Flor Diaz, maoy unang mipakita og aksiyon sa women’s 45-kg. class niadtong Miyerkules diin mitapos kini sa ikapitong puwesto sa 18 ka mga partisipante sa snatch and clean ug sa jerk.
Hinuon si Diaz maoy ikaupat nga taga Southeast Asian sa iyang divison sunod sa bronze medal winner nga si Setiawati sa Indonesa, ug sa Vietnamese nga si Vuo Thai Huyen ug Khong My Phuong. (JBM)