HUMAN sa pipila ka tuig nga serbisyo sa Zamboanga-Family’s Brand Sardines, opisyal na nga mahitapo ang Sugboanong si Reed Juntilla sa Bataan Risers.
Kini sa dihang giaprobahan na ni Kenneth Duremdes, commissioner sa Maharlika Pilipinas Basketball League (MPBL) ang trade tali ni Juntilla ug Alvin Pasaol, ang batan-ong forward sa Bataan Risers nga ubos na karon sa bag-ong management.
Si Juntilla, kinsa nalakip sa MPBL All-Star, maoy top gunner sa Zamboanga, ang team nga usa na lang ka tikang nga makaabot sa Southern Division finals sa niaging season.
Samtang si Pasaol, usa sa mga nag-unang magdudula usab sa nasod sa 3-on-3, mao usab ang giilang lider sa opensa sa iyang panahon sa University of the East sa wala pa kini motapon sa MPBL.
Gilaoman nga ang pagkahilakip ni Pasaol sa Zamboanga makapadugang sa ilang puwersa sa ilawom samtang si Juntilla gipaabot nga dako og matampo sa opensa sa bag-ong gi-revamp nga Bataan.
Niadtong Miyerkules, ang Zamboanga nabuntog sa Cebu Sharks, 74-70, alang sa ilang 8-8 nga baraha.
Ang Cebu nga ubos na karon sa pagdumala ni coach Noynoy Falcasantos mirehistro na usab og 5-8 nga record.
Si William McAloney, kanhi sakop sa University of San Carlos (USC) Warriors, nangulo sa Sharks nga may 28 puntos. (JBM)